“话题女王”冯盈盈与江嘉敏去年因出席富豪船P令关系决裂,早两日踢爆佢哋被无綫点名要拍档做主持,焗住破冰,昨日2人已极速为节目《解构心机女》开工,更世纪合照添!
大晒心机事业线嘅冯盈盈,大方“万岁”请众人饮嘢,更细心为江嘉敏预备一杯少甜走冰嘅珍珠奶茶,贺佢第1次喺TVB做主持,对昔日闺蜜依然照顾有加,明显有心同对方重修旧好,一开拍就示好加油打气,仲话要一齐做好个骚。江嘉敏亦表现受落,仲难得肯答应同冯盈盈世纪合照,似乎二人今次可以合作愉快啵。而冯盈盈好大方喺社交网发文自抽佢哋“破冰”呢件事:“破。冰……sorry打错,走冰先啱,珍珠奶茶少甜走冰,知道嘉敏今日第一次做主持,请你饮珍珠奶茶,为你加油打气💪🏻我哋一齐做好个show😉”。 师姐请师妹饮嘢成件事都好有爱,不过随后江嘉敏喺社交网发文,竟然唔领情冇饮冯盈盈杯珍珠奶茶:“多冰,少冰,走冰,都不适合我😣😣😣难得师姐请我这个新人喝珍珠奶茶,但我这个星期不能碰冰!🧊🧊对不起啦,师姐,下次再请我喝吧!😉😉实在对不起大家,我一工作就会放下电话,照片连filter也懒得加,所以最近更新得太少了。🥺🥺忙完之后,我会努力去探索香港更多美丽的地方,探索一下更美味的美食,拍更好的照片。🥰🥰🥰”而据佢所讲,系因为撞啱女士每个月唔方便嘅日子,所以先冇饮啫! ​
冯盈盈受访时表示:“知道嘉敏第一次做主持,难免会因为冇经验而紧张,所以请佢饮珍珠奶茶,希望佢可以唔好太紧张,为佢加油打气,而我喺主持方面经验比佢丰富,如果佢有咩问题,都欢迎佢随时问我,我定会乐意解答,跟佢分享我心得。” 佢又话倾到心机女恋爱约会技巧:“我就可能要向嘉敏请教才对,佢系几位女主持中唯一拍紧拖,平时睇佢同男朋友Anthony喺社交平台上嘅高调放闪,就知Anthony对佢几好,嘉敏亦治得男友帖帖服服,无论经历几大嘅难关同风浪,佢哋两个嘅感情都仲保持到,当中嘅秘技系咩,我期待嘉敏喺节目中同我哋各位好姊妹大方分享。”
|