马国明冧庄视帝 汤洛雯承诺结婚

etin

视帝马国明去年6月同汤洛雯（靓汤）拍拖，半年来仲经常上女友香闺，实行半同居试婚！有传马国明求婚成功兼今年拉埋天窗嘅佢哋，最近又被东网影到去视察位于马鞍山嘅新婚爱巢，有晒结婚迹象！

而踏入2021年后，靓汤喺社交网写道：“2021快乐！”不过睇真啲，右下角有几行细字：“既然你哋咁想，如果，我系话如果呀吓，佢今年冧庄（视帝），就结啦😜”有网民问佢：“我cap咗图㗎喇，为拉票定为结婚先？”仲有好多人话因为咁要投票畀马国明，仲话要集气：“马国明一定攞硬最佳男主角，2021靓汤结硬婚！”、“期待你穿婚纱的照片！”、“靓汤你记得兑现呀！”，仲纷纷恭喜定佢，叫佢唔好走数呀！

靓汤有冇得找数？真系要睇彩数，不过“明汤”接受访问时，就继续冤气，靓汤话：“佢攞到咪认真考虑啰，但系今年对手都好强嘅，咁作为佢身边人当然支持佢！”叫马国明开Post拉票？佢再话：“其实都要睇番大家实力嘅，攞奖项呢啲系讲天时地利人和，到时咪知啰！”而马国明就话：“其实因为佢知我应该攞唔到先讲笑……希望大家新嘅1年开开心心……”​