龚嘉欣由“咸鱼”做起唔攞视后唔甘心

etin

无綫力捧花旦龚嘉欣在新剧“床战”连场，她形容激烈得留有阴影，以后不会再有这样的演出。今年成功上车做业主的她，下一个目标是视后，虽有传与马来西亚富二代分手，但坦言目前要她放弃事业去结婚生仔，肯定会不甘心！

龚嘉欣在无綫剧集《香港爱情故事》中的床戏成为热话，由情侣酒店“大战”到“太空舱”，目的是带出土地问题，却令她叫苦连天：“因为真系几激烈！最深印象系‘太空舱’嘅床戏，环境好窄，罗天宇近乎冇着衫，大家又要同对方除衫。”最尴尬是他们本身并不认识，开工前更加零沟通，她续说：“我哋夹硬嚟咋，现场听监制、导演指示，不过同佢拍感觉都舒服嘅。”却又扬言：“冇下次喇！”

刚购入将军澳2房单位首次做业主的她，反而没有要求另一半要有楼。她亦是租了6年村屋，左悭右悭才储到首期，她认真地说：“最紧要遇到啱嘅人，到时再谂办法。”又称现阶段是事业搏杀期，完全不心急拍拖，即使最近有指与富二代分开，她仍说：“依家拍拖就会谂结婚，身边都有唔同嘅人出现，但系唔啱就唔好开始。”对于好姊妹陈凯琳、谭凯琪都先后嫁人，只有她感情未有着落，她只说：“我好容易爱上一个人，加上生长喺一个唔完整嘅家庭，我本来觉得20几岁就会结婚，后来发现呢啲唔系爱……其实只系唔想一个人。当然我都替好姊妹搵得幸福开心，但又唔可以话我羡慕。”

“奸角”“港女”晒全方位演技

今年事业上对龚嘉欣来说是突破的一年，先后有剧集《大酱园》、《杀手》、《香港爱情故事》，以及稍后播出的《坚离地爱坚离地》出街，4剧在手，角色截然不同，有癫丧杀手亦有贴地港女，令观众对其全面演技眼前一亮，有力挑战台庆颁奖礼“视后”宝座，她亦直言要努力为事业冲刺：“如果依家叫我放弃事业会觉得唔甘心，因为觉得未到想去到嘅阶段，希望每次演嘅角色都有进步。”讲到挑战“视后”，她说：“今年几个角色嘅反应都好好，《大酱园》细么奸到大家都憎死佢，《杀》大家又见到一个好癫嘅我，《香》剧就系贴地生活化嘅港女，角色都好唔同，今年系自己最大突破嘅一年！观众喜爱、认同好紧要，有好多观众写长文鼓励我，话睇到我进步、变化，有观众鼓励令到我信心大咗，‘视后’会系终极目标，呢个奖系好有鼓励、肯定性。”

​“我系一步步挨返嚟”

入行12年，演过不同角色，由扮死尸到站稳“女一”之列，她回想当年入行由零开始，实在是宝贵经验：“好记得嗰阵拍《怒火街头》试过要扮死尸，喺厂瞓地下成晚唔郁得，扮死尸系好好嘅经验，我唔系港姐出身，入TVB亦冇人推荐，自己真系由零开始，一步一步靠努力挨返嚟！由扮死尸到依家都冇变，都系唔怕蚀底同咁挨得。”

早前于《杀》剧饰演“Dark Angel”开拓打女路线，但亦为她留下一身伤，现时仍要接受物理治疗，她说：“拍剧以嚟最辛苦系《杀手》，打戏出嚟2分钟，但就拍足全日，打到成身瘀晒、损晒，当时成身冇一忽好肉。最严重嘅伤系上5吋下5吋穿咗个窿要缝针，依家成条脊椎肌肉亦扭埋一边，要长期做物理治疗，尽量唔可以着超过半吋高踭鞋。不过受伤都值得，证明我做到打女，有机会都会再拍动作戏。”