最惊“第三只手”！康华报纸包现金都畀人偷

etin

近日马鞍山豪宅、元朗独立屋、北角足浴店等均遭受到贼人爆窃，不知圈中艺人有冇试过畀人偷嘢或爆窃嘅经历？

歌手J.Arie（雷深如）：“我就未试过入屋爆窃，但我都试过畀人偷钱啰，嗰时我读紧大学，畀一个啱啱新识，但又好信任嘅朋友偷钱，事缘嗰阵时啱啱帮人补习，好辛苦赚钱番嚟终于出粮，但系嗰个朋友出完一个街，我系几肯定唔系喺街畀人偷，因为我嘅银包健在，乜嘢都冇偷过，只系袋入面嘅钱唔见晒，唔系好多，四、五千元，我就怀疑系嗰个朋友做，一开始就怀疑，但之后都肯定系嗰个朋友做，因为有另外一个朋友都话之前试过同呢个朋友出完街，同样有咁嘅经历，又系唔见咗钱，好似唔见过表，感觉好似畀一个信任嘅人背叛咁啰。”

36G咪神崔碧珈：“两年前嘅圣诞节喺英国条街度，畀人第一次扒咗个银包，我喺Chinatown附近同朋友食嘢，然后去行街，记得我当时系好轻便，冇攞手袋，净系着住件羽绒，将个有啲重量嘅长银包放咗喺个羽绒袋度，入面有齐Passport、所有证件，当日仲袋咗比较多现金，大概都有万几蚊港纸，就怀疑可能件羽绒太松，但我明明记得系拉咗拉链，同埋我有个惯性系好锺意摸吓个袋，睇吓啲嘢喺唔喺度。我谂我发现嘅时候都系畀人扒咗银包5至10分钟，冇咗本Passport，但我嗰阵系过多两、三日就要返香港，我朋友就同我即刻行去最近嘅警局报案，都搞咗两、三个钟，再打畀喺香港嘅妈咪叫佢帮手Cut卡，仲同喺香港嘅驻英领事馆讲，Send埋Email，第一次出国冇咗Passport，钱财都系身外物，冇咗都唔太担心。之后喺英国再去驻港领事馆攞咗好似张行街纸咁搭飞机，好彩唔使改机票都返到香港！所以呢次教训就系银包唔好放太多现金、唔好带埋本Passport出街，出国去街都会再小心啲。”

艺人康华：“曾经喺内地第一次拍戏，收第一期订金，用报纸包住，好深刻印象，可能有啲人知道，行政人员派期票畀艺人，系用报纸包住，所以我返房唔见咗嗰包报纸，嗰时系一次畀订金我，啲钱唔系咁多，攞报纸包住，谂住都冇人攞，点知唔见咗。可能有人知，听讲系助手攞咗！第二次就试过，全层住客都系同剧组住，有人唔见电话、电脑、现金、衫等，所以之后都冇乜将钱放喺酒店度！”

男星李日朗：“我试过喺香港畀人偷过银包同电话。有一次喺间餐厅度食饭，我一坐低就将电话、银包放喺枱面，然之后就落单点餐，就系喺呢个咁短时间，我部电话、银包就咁唔见咗。我觉得好多时候啲小偷喺你注意力唔集中、或者分散你注意力啲时候会埋手。我都提醒吓大家尽量将随身物件放喺裤袋或手袋入面，咁就较为安全。”​