有“狂野空姐”之称嘅落选港姐廖慧仪是非多多,本身有圈外男友Sam嘅佢,早前被指挞着无綫节目《#后生仔倾吓偈》嘅23岁孔德贤(Danny),Sam嬲到喺社交网公开“警告”Danny唔好再搵自己女友。
廖慧仪接受访问时就表示同男友仲拍紧拖,对方只系饮醉咗,而Sam就话对女朋友百分百信任,怀疑两人拍拖系自己问题。点知事隔10日,Sam今日凌晨突然喺社交网发文自爆被狠飞:“同你一齐呢一年半,大大小小伤心嘅事我都陪你经历过,喺你有低潮困难嘅时候,我从来冇离开过你身边,而点解你要咁样对我,去报答我一年半对你嘅所有付出?我一直当你系一家人,点解要选择因为一啲小问题而突然狠心离开我,系咪因为入咗娱乐圈扩阔咗眼界,回头看所有嘢觉得我甚么都不是?”佢又随文附上一张两人互咬食物甜蜜照,不过之后佢已将Post删走!廖慧仪寻晚就上载单人瑜伽照,寻日仲同男女朋友去行山,露出美甜笑容,心情似乎相当好!
|