被汤洛雯朱千雪爆结婚！32岁岑杏贤开P大晒钻戒

etin

昨日32岁生日嘅岑杏贤（Jennifer），接受访问时，被问到系咪即将结婚时，笑谓：“暂时未系啰！顺其自然啦！”点知原来真系准备结婚！好姊妹汤洛雯、朱千雪、张嘉儿及蒋家旻等喺社交网上载Jennifer生日兼婚前派对合照，留言：“希望你喜欢我们为你准备的一切，只想你幸福、快乐。”朱千雪就以英文话：“一年前，你接到我喺婚礼上抛嘅花球。一年后，我哋为你搞婚前派对。”5人齐齐坐喺床上影相，准新娘仲大晒钻戒添！

Jennifer接受访问时表示：“依家嘅心情仍然好开心好惊喜好感动，因为冇谂过一班姊妹都忙着工作，都为我送上最大嘅生日祝福，佢哋好锡我，知道我搵到一个适合嘅人，大家过咗一个好感动好难忘嘅一晚！其他细节唔透露太多，想留番少少空间畀大家，希望你哋可以体谅，但真心多谢all your blessings，亦衷心多谢每一位所有嘅祝福🌈”佢又透露已经求咗婚一段时间：“但一直保密，冇同大家公开系因为未婚夫系圈外人，想尊重佢低调处理，希望大家唔好介意同明白。”

Jennifer一直好好保护新欢，据知男友Kelvin从事金融业，现年34岁，两人发展情侣关系近一年，两人系去年出席朋友婚礼时邂逅，相识一、两个月便拍拖。而佢嘅旧爱袁伟豪早前先向张宝儿求婚成功，不过就未有婚期，如今Jennifer快人一步，率先结婚！袁伟豪得悉Jennifer结婚时，受访表示：“祝福佢哋幸福快乐🥰”

Jennifer为保爱苗，都冇摆过未婚夫Kelvin上社交网放闪，去到接近深夜，佢破例第一次甫两口子合照，真系闪到爆！

佢仲用英文留言，意指：“收到所有人的祝福，大家都非常热情，老实说，今个生日会最令人难忘！我感到非常幸福和感激，我找到了我的Mr.Right！”