【一切从简】张宝儿同袁伟豪未谂掂几时结婚

etin

艺人张宝儿（Bowie）前晚在社交平台宣布被男友袁伟豪（Ben）求婚成功，昨日她在牛头角一栋商业大厦拍摄新剧《儿科医生》，约下午三时多，她落楼见记者接受访问，见她全程心情轻松愉快、明艳照人，记者先恭喜她，她即笑不拢嘴。讲到她手上没有戴上3卡求婚戒指，她笑言因为要开剧。问到为何求婚一周年才公布喜讯？她笑言：“因为一周年日子比较特别，所以寻日公布。（之前唔知Ben会求婚？ ）真系唔知，早上因为我有时差所以同佢去跑步，冇任何计划，随缘咁发生。”

讲到求婚时两人都感动流泪，她笑言：“其实我唔知佢喊，后尾睇返片先知佢喊，我嗰阵好震撼，好似充血上脑咁，听唔到佢讲咩。（因为你净系挂住望戒指？）哈哈，嗰时睇唔到嘢，画面蒙咗，同想像中嘅情绪、画面唔同，因为身边冇其他人，所以冇任何压力去控制情绪，嗰阵好震撼，听唔到同睇唔到其他嘢。”

讲到受疫情影响，可会心急举行婚礼？ 她谓：“唔心急，希望大家喺放心、安全嘅环境下享受呢件事，同大家分享。（计划几时举行婚礼？）未有计划，构思紧，依家大家都比较忙，我都尽力抽时间处理。（最快都要出年先举行到？）希望啦，等疫情稳定啲。（会喺香港定外国搞婚礼？）睇吓情况，睇香港定系外国，睇吓出唔出到国做。”问到想婚礼如何举行？她谓想与家人、至亲好友分享就够，问到可会搵伴郎伴娘？她谓一切从简：“大家未必需要会理呢啲繁琐事情，希望大家享受。”

问到Ben许下甚么承诺？她表示：“一个婚姻，希望以后一齐行，建立大家嘅家庭。（心急生BB？）唔心急，一步步嚟。”问到她之前可是已影了婚纱相？她笑言：“嗰啲系自己影嘅fashion相，冇佢。（计划几时影？）希望一齐夹到时间，同埋希望可以外面影。（边度？）如果去到再话畀大家知，要安全为上。”而讲到两人之前联名买新楼，她谓新楼仍在装修中，问到爸爸可会送楼给他们做结婚礼物？她笑言不清楚。​