艺人想要咩法宝？傅嘉莉恨要快速化妆镜

etin

最近有插画师将多啦A梦恶搞变哆啦AV梦，引起网民热烈讨论，甚至有人话童年崩坏，问到艺人最想拥有多啦A梦的哪样法宝，或者可以自制法宝，又想有咩功能呢？

傅嘉莉：“如果想多啦A梦发明一样法宝畀我，我会想要一个快速化妆镜，一起身对住块镜就可以好快化咗个全妆，我就最想啦……因为可以瞓多啲觉，咁就可以悭到好多时间，唔该晒呀，多啦A梦！”

森美：“我想要竹蜻蜓，因为可以四围飞，自由自在好开心，不过之前睇到啲日本书讲伪科学，将卡通片有嘅嘢变真会有咩灾难，而竹蜻蜓因爲旋转力太大，好似直升机咁，会连埋头皮扯走，哈哈，但都想冒险试竹蜻蜓。（但会变光头？）唔只光头，系成个头殻都冇埋，但自由自在好难得，好似航拍咁睇到高空飞翔嘅画面。”他又谓如果可以自制法宝的话，想要快乐药丸：“每次食到就可以得到开心，好难得。”他又笑言最想要百宝袋：“因为锺意嘅嘢太多，咩都可以攞晒。”

去年亚姐亚军罗思雅表示想要随意门：“因为依家唔可以随时搭飞机去旅行，有随意门唔使等好耐就可以去第二度，自己最想去英国，用随意门悭番十几个钟机程，喺英国读完书后，只系返过去一次，好耐冇再返，好挂住嗰边嘅嘢食。”

歌手J.Arie（雷深如）表示：“我想要感动麦克风，因为做歌手，好想唱出嚟嘅歌、做出嚟嘅作品，可以感动到听众，我仲想搵一啲地方，可以尽情广播，所有人都听到嘅，大家一听到我用呢个麦克风讲嘢或者唱歌，都会感动到喊，哈哈，咁就真系无敌喇。”

喺《爱．回家之开心速递》中饰演“Terry”的李伟健表示：“我最想要随意门，因为可以好快咁去到好多地方，咁就可以悭番好多时间，可以做多啲自己喜欢嘅嘢。”