做乜喊得咁凄凉？吴沚默每滴眼泪都系经历

etin

被喻为TVB“文青女神”的吴沚默（Momo），早前推出了两本新书还连踩三剧《刑侦日记》、《BB大晒》及《一笑渡凡间》，工作相当忙碌，差点连瞓觉都冇时间，连拍三剧，角色经常转来换去，挑战性甚高，但Momo亦乐于接受挑战：“三个剧嘅角色都好唔同，个个我都好喜欢同拍得好投入，记得拍《一笑》嘅时候，因为我个角色都几惨，试过拍一场喊戏，Cut咗机我都继续喊，导演都吓一吓，问我有冇事，我喊住话冇事。”

出书兼拍剧，事业看似一帆风顺，事实却不然，Momo去年曾经过半年冇工开，收入锐减当然难挨，但最大问题是丧失自信心，Momo说：“因为喺无綫都有份底薪，所以经济唔系最大问题，反而嗰个时候，最大问题系失去咗希望，因为我屋企人唔喺香港，朝早起身冇人，瞓到几点冇人理，唔使返工，真系好迷惘，好彩当时同个女仔一齐住，佢系社工嚟，我有一日问佢可唔可以倾下偈，佢当时话如果我需要专业谘询可以帮我转介，但唔可以自己做，因为朋友系唔得，但我同佢讲，我只系想倾吓偈，我哋仲特登约出去餐厅倾，当时我同佢讲，我冇嘢做，我觉得冇人想睇我做戏……”

这时，Momo有所感触哭起来：“点知我讲完，我朋友即刻喊……我问佢做乜你喊呀？佢话觉得好伤心，因为一个锺意拍戏嘅人，觉得冇人想睇佢演戏，系一件好难受嘅事，佢戥我好心痛…”Momo边说边哭，要停一停才能再说下去：“我好多谢佢陪我度过嗰一段时间。”

除了曾遇上事业低潮，原来爱情方面，Momo都遇过“渣男”，受过爱情重伤：“记得啱啱大学毕业嘅时候，第一次同一个已经喺社会工作紧嘅男仔拍拖，一齐咗冇几耐，已经发觉佢好少搵我，我当时仲同自己讲，可能出嚟社会做嘢嘅人系咁，仲以为自己思想好成熟，点知等咗三个礼拜，有一晚深夜顶唔住打畀佢，点知系一个女仔听，令我终于明白发生乜嘢事。”发现男友一脚踏两船，当然有跟对方对质，但感情已破裂，她亦决定分手，当然十分伤心：“我喊咗好几日，但喊完、痛完就算，唔会再浪费时间去谂。”

爱情经历当然不会只有苦没有甜，Momo笑言曾跟一位“韩男”拍拖，还跟对方试过“爱的错摸”：“异地恋，记得有一次我有几日假，特登唔讲畀佢知去咗韩国，去到佢楼下打畀佢，点知，佢喺电话另一边静咗一阵，再同我讲，佢系我间房入面…我听完即刻爆喊，因为我再飞返香港，见嘅时间又少咗。”虽然爱得甜蜜，但始终两人分隔两地，很难有未来，所以最后都是分手收场。​