宅家煲好戏 张智霖戏剧人生冷暖在心

etin

新冠肺炎疫情进入第三波，戏院再度关闭，如果想睇戏，就要喺屋企搵戏“煲”，究竟一班艺人会有乜嘢星级推介？同埋点解要介绍畀大家先？

张智霖（ChiLam）有份演嘅《总是有爱在隔离》暂时未知几时上映，除该片外，佢话自己仲有好几部戏拍咗但未有得上画，谈到内地工作，他指因为返内地要隔离14日，要被困14日喺心态上未必接受到，所以要睇定啲先，感谢制作单位调动配合。

提到依家冇得入戏院睇戏，佢就推介喺屋企睇电影《缺氧37秒》：“呢套戏系讲一对双胞胎，因为最后出世嗰个曾经缺氧37秒，之后出现脑麻痹，影响到佢之后嘅生活，我觉得套戏拍得好好，令到我觉得幸福并唔系必然，要珍惜所有。”除此之外，他又推介节目《乘风破浪的姐姐》，见到30位女演员大放异彩，提醒自己都要喺工作上全力以赴。

至于去年有两部电影入围角逐金像奖最佳女主角同最佳女配角嘅余香凝，就喜欢睇喜剧：“我喺屋企会睇啲轻松、好笑、浪漫为主嘅戏，因为疫情关系，睇新闻大家都会有好多嘢担心；最近我睇咗两出戏，一套系《The Holiday》讲两个女主角因为失恋而交换咗间屋度假，期间物色到爱人，几开心同好笑，睇完之后会觉得缘分系急唔嚟，上天会安排，有时攞走你一啲嘢，佢又会畀番啲嘢你。”

另一套是《The Change Up》：“讲两个唔同身份嘅男人调转咗身体，本来佢哋都各自好羡慕对方嘅生活，转换咗之后都觉得好轻松自在，但最后都觉得对方人生应该畀番对方，呢出戏系叫人唔好因为事业而忽略一啲其他嘢，要更加留意番同唔好Miss身边嘅嘢。”原本余香凝七月底开戏，但依家因为疫情关系要延后，所以好希望疫情快啲过，大家身体健康去开工，亦希望套戏可以尽快开功。

至于“宅男女神”邓月平不嬲都系周星驰粉丝，喺屋企睇戏当然首选“至爱”嘅周星驰系列：“依家冇得去戏院睇戏，喺屋企睇戏嘅话，我会推介《西游记大结局之仙履奇缘》同埋《回魂夜》，虽然系喜剧，但有好多情节都会令人有所反思，同埋周星驰嘅电影好注重细节，每睇一次，我都会发现到唔同嘅嘢，周星驰嘅戏好特别，喜剧得嚟又会唏嘘，而唏嘘得嚟又有喜剧，所以，想推荐畀大家。”

而影坛新贵卫诗雅就话要睇励志片：“我会翻煲电影《小妇人》，呢套系讲1868年一班女仔嘅奋斗史，因为嗰阵时，女性地位比较低，佢哋都能够创出一番事业，自强不息，仲会帮助身边人，系一套好励志同埋好鼓励女性嘅电影。”​