政府因疫情推出“现金发放计划”,向全港年满18岁嘅市民发放一万蚊,有唔少艺人都有去申请,其中江嘉敏就话虽然未收到笔钱,但已经先使未来钱:“细妹最近生日,买咗部价值3,000蚊嘅游戏机畀佢,之后嗰7,000蚊呢,都好好用㗎!哈哈!因为细妹同妈妈都想学车,仲使凸咗添!”问到细妹同妈妈嗰一万蚊会唔会用喺佢身上?嘉敏抵死笑话:“梗系唔会啦!如果佢哋用喺我身上,我真系喊出嚟⋯开心到喊呀,哈哈!咁都要预佢哋唔合格再考过嘛!加上屋企人啲生日堆埋喺同一个月,真系使凸!”
林盛斌99%投资优质股等派息 至于林盛斌(Bob)话会攞99%去投资,入吓啲优质股:“等佢慢慢派息同增值,或者入啲美股,不过只会买指数基金。”最后剩番嗰1%,就用嚟食:“出去买两兜烧卖、鱼蛋、煎酿三宝畀班细路食吓、开心吓,兼刺激吓香港个经济,支持吓啲小店!”
黄嘉雯医狗狗兼做善事爱心爆棚 港姐黄嘉雯都话未收到,但佢已经谂定点用:“屋企人最近领养咗只狗狗,大家都好锡佢,但佢呼吸道唔系太好,成日喘气同打鼻鼾,都谂住买啲保健食品畀佢,等佢增强抵抗力!”佢仲话用剩嘅就会捐畀慈善机构,希望帮到更多嘅人,简直系爱心爆棚!
翟威廉投资生意钱搵钱 近日开设日本清酒小店嘅翟威廉,就话会先储起一万蚊,迟啲再睇吓有咩Project需要资金:“喺呢个时势都唔会随便使钱,尤其是一万蚊都唔系少钱,会储起先,总有好多机会用得到,自己暂时冇乜需要,又冇乜娱乐想做。”
|