吴千语同富三代筑3千万爱巢 拟出年拉埋天窗

etin

林峯旧爱吴千语跟家族资产逾百亿嘅“富三代”施伯雄翻挞，两口子成日喺社交网低调放闪，感情愈来愈稳定。唔经唔觉千语BB已经26岁，据知施伯雄已准备好出年迎娶“BB”，仲喺旧年年尾一掷3,000万喺清水湾傲泷，购入1,800呎豪宅。有埋新婚爱巢，千语BB幸福爆灯，一啲都唔输蚀畀林峯呀！其实千语BB已融入施伯雄家中，又同佢嘅朋友圈稔熟，就算两口子去公园拍拖，千语都系坐自己原名吴欣容登记嘅名车，吊诡系呢驾车登记地址就系施伯雄嘅南湾豪宅，有车又有楼，千语BB依家只欠一纸婚书。

施伯雄真系好锡BB，据知，爱巢装修落重本，屋内大玩欧陆风，又有大浴缸方便鸳鸯戏水，佢知BB锺意煮嘢食，就连3万蚊一个焗炉眼都唔眨就买咗。不过依家因为疫情关系，二人婚期最快都要等到出年下半年，千语BB依家可以学定做人妻都得喇！

​致电吴千语，对于出年嫁施伯雄，佢就话：“仍然工作为先，暂时未有计划，多谢关心！”