林奕匡失足堕海撞石甩骹 损手烂脚住院数天

etin

炎炎夏日系出海游船河嘅好时机，歌手林奕匡（Phil）日前亦与朋友出海吹海风，不过就乐极生悲，落船时意外失足，严重到入院住咗几日，依家已经冇乜大碍，已出院回家。林奕匡喺社交网上载多张相片，见佢双脚包扎纱布，右手亦打石膏，佢留言：“回家真好～几天前和朋友出海，落船时失足意外，住院数天，万分感谢所有医护人员的照顾。”佢仲特别答谢骨科部门嘅护士，以及救护车嘅救护人员。唔少网民同艺人好友留言慰问，包括方力申、胡鸿钧、郑欣宜、吴业坤、周柏豪等，祝林奕匡早日康复，仲叮嘱佢以后小心睇路！

Phil透露当日与太太Rikko（李霭玑）及几个友人到西贡离岛玩，当他落船之际，突然有浪涌过来：“因为有旧大石，但我踩唔实旧石，个人就跣一吓跌咗落海，右手臂就撞到旧大石甩咗骹，加上旧右有好多Barnacles（藤壶），𠝹损晒我啲手手脚脚，嗰刻𠝹损啲位我唔痛，因为feel唔到，但feel到右手郁唔到，好彩我捉紧右臂时，感觉入咗一下个骹位，只手郁得番上到船。”朋友随即接载他到西贡码头，亦帮他叫白车入院。

他表示医护人员对他照顾周到，他说：“我未试过住医院，因为我手脚伤口较多，而且浸过海水，医生惊会发炎，所以要他留院，每隔8小时就打一次针，住医院真系好唔惯，因为个膊头好痛，我瞓唔到觉，住咗3日院终于返到屋企，感觉舒服好多。”他庆幸有太太照顾，每日揸车到医院给他送饭及珍珠奶茶，还向朋友借电话给他解闷，他说：“因为我跌落海时，部电话跌埋落海搵唔番。因为伤口不能湿水，所以我冲唔到凉，只可以抹身，所有嘢连埋屋企都系Rikko做晒，因为我真系好唔方便。”

​出事后他本想第一时通知公司同事，但因为冇咗电话，他冇晒同事的电话号码，唯有上网透过社交平台联络，他说：“好彩两星期前我已经拍咗新歌《精神时间房》MV，所以冇影响出新歌时间，算系不幸中大幸，宣传上就有少少阻碍，自己弹唔到琴，但我仲唱到歌嘅，MV好快推出，未来我都要去覆诊又要做物理治疗，希望同宣传工作互相迁就唔会阻晒，我会尽量喺屋企休息，希望快啲痊愈。”