歌手谢安琪(Kay)最近为音乐人Jerald主持嘅网台做嘉宾,重提当年突然退隐原因!2016年再创事业高峰期嘅佢选择暂别乐坛,除咗系因为想再生BB外,原来仲要另一个从未公开讲过嘅原因,就系因为声带出现问题,突然间唱唔到歌:“嗰几年真系对自己冇信心,我直头系声带有事!我个音域系中间冇声,系一个好奇怪现象,一系你好低音,一系你唱唔到高音,当时我情况系唱歌突然间唱唔到!”
虽然佢有去睇医生,睇过耳鼻喉科同照埋声带,但都话冇问题,医生就话佢压力好大:“‘你最需要休息,你将唱歌放埋一边。你唔会讲讲吓冇咗一粒音,点解唱歌会发生呢?’个一刻我决定休息,但呢件事冇同人讲过!”
喺同年9月佢宣布再度怀孕,诞下囡囡后专心相夫教子,但休息不足3年就复出,当初佢预算休息一段漫长时间,但喺2019年决定再开演唱会!事隔3年再开踏红馆,佢多次直言“好惊”:“我对上一次演唱会完咗直接休息,我咁多年后我第一次企返台上我惊到不得了!”幸得Jerald陪伴,佢个心先定一定!
Kay接受访问时表示多谢大家关心,其实声带出现问题,系多年前嘅事,但经过长时间调理身体及心情后,现已完全康复,又指觉得呢件事对佢嚟讲系另有意义:“对歌手嚟讲系好大挑战,原来系咁差状况,经过调理好身体、心情,同充足时间休息,系可完全康复嘅,呢件事亦畀咗好大信心我,同埋畀个警剔我,喺去年开演唱会时,都试过重感冒同哮喘有啲发作,我立即畀自己休息,学识更加爱惜自己身体同声线。”佢又话虽然近期少露面,加上受疫情影响,但冇浪费时间,继续同麦浚龙忙合辑事宜,仲有倾广告等,工作一直冇停过,仲有做运动强健身体及同家人相处。​
|