“出轨”拍激情戏禁老婆监场！郑嘉颖唔敢讲BB

etin

由郑嘉颖、朱晨丽主演的电影《焚身》，昨日进行开镜拜神仪式，同场还有监制黄百鸣、罗兰及小演员黄嗣舜。嘉颖今次是自太太陈凯琳（Grace）宣布再怀孕后首度现身，他透露戏中饰演朱晨丽老公及医生，不过后来会跟患精神病的“小三”出轨，惹来一身麻烦：“搞到好大镬！就嚟家破人亡，呢套戏系畀已婚男士睇，作为一个警惕，千祈咪（出轨）！”

问到跟情妇会有激情戏？他笑言：“喺电影嘅角度唔算，系比电视多啲。（有同Grace备定案？）当然有！有个好处系佢都系演员，都会明白。”Grace有话嚟监场？嘉颖即Say No：“大住肚就唔好啦！呢度又咁热，都想佢尽量少啲出街。（见佢都有拍片做运动。）佢性格系唔停得、坐唔定，喺屋企就觉得浪费时间，想佢需要休息就休息。（会话佢？）咁大个都唔使话，佢自己有分寸㗎啦！互相尊重，都明白佢日日喺屋企都闷。”追问到Grace几时预产期？现时几多个月？BB性别？他全部避谈：“等佢（Grace）讲啦！我惊我讲错嘢呀！”

当转话题讲到囝囝Rafael，嘉颖即冧样尽现，他笑指囝囝还未知将“升呢”做哥哥：“佢嘢都未识讲，净系讲火星话。（佢有摸Grace个肚？）惊佢会用力拍，因为佢仲未明白有个小生命喺入面。”屋企再添新成员，要再勤力搵奶粉钱？他指：“呢个时势有工开已经好幸运，我又未退休，都唔可以日日喺屋企。”

讲到有传Grace密谋离巢，嘉颖就话唔清楚：“但佢当年应该签咗好长，下次你哋问佢啦！”另外，问到他是否会返无綫拍剧，替多次推剧的Grace还“人情债”，嘉颖闻言笑话：“呢个世界有啲咁嘅嘢咩？父债子还呀？会唔会有啲咁嘅事呀？唔好信啦！（真系返去拍剧？）一日都未Confirm嘅嘢都唔会撇除可能性，适当时候先再讲。”​