四姊妹进军幕前？谭凯琪家姐原来系“阳光妹”

etin

圈中一向都有唔少索爆姊妹花突围而出，就好似汤洛雯同妹妹汤乐瑶，余香凝同妹妹余洁滢等，都成功俘虏一众宅男！但系唔讲都可能唔记得，最近喺热播剧《降魔的2.0》同《飞虎之雷霆极战》都有份演出嘅谭凯琪，佢家姐谭凯欣都有做过幕前㗎！

谭凯欣喺1991年做“阳光妹”入行，拍完广告之后，佢凭住甜到爆嘅样子，好快就受人注目，之后转战影坛，拍过《新僵尸先生》、《飞虎雄心》等电影，到咗2005年，佢同前组合风火海成员朱永棠（《古惑仔》“巢皮”）结婚，婚后生咗两个女，淡出幕前。到咗近年佢活跃喺社交网，不时晒近照，睇到佢身材同个样依然Keep到，完全唔似系人哋妈咪添！

最近网上盛传谭凯琪原来系有“四姊妹”，仲话四姊妹都曾经进军幕前，分别系大家姐谭凯欣、二家姐谭凯韵同埋细妹谭凯伦、但系谭凯琪好快就出嚟澄清话，佢只系得一个家姐谭凯欣，其他嗰两个都同佢冇血缘关系㗎，大家唔好误会啦！

其实睇番传闻系二家姐嘅谭凯韵曾经做过电视台新闻台主播，个样够晒斯文，喺网上都有唔少粉丝，但系睇落就同谭凯琪唔系好似样啰！而传闻系细妹嘅谭凯伦系“ViuTV女神”，有唔少纹身嘅佢，身材火辣，不时喺社交网晒性感相派福利，佢仲曾被指暗挞夏雨儿子黄奕晨，卷入“小三”疑云。​