连诗雅宁愿得棚骨 忍口搞到抑鬱

etin

拥有43吋长腿、模特儿身形的连诗雅（Shiga）自爆五、六年前试过不健康的减肥，为了减肥上镜好睇，她说：“我真系一日食三包梳打饼，又试过连续两个星期日日三餐都系食粥，去到最后连粥都唔食，只系食粥水，嗰时瘦到得番102、3磅，以我高度嚟讲系超级唔健康，但最惨我块面特别包包，个身就算得棚骨，块面上镜先系啱啱好，但过分唔食嘢好易会有躁鬱症、焦虑症，甚至乎有抑鬱症，嗰时开始好易忟好唔开心，又瞓唔到觉，但嗰阵唔知系点解嘅，当我享受到食物畀我嘅快乐，我就明白啰。”

身边同事朋友都赞过她在减肥方面有毅力，她说：“我话唔就唔食，嗰时过度节食佢哋就闹我‘练仙’。”依家她学懂食得健康，钻研好多煮食方法，加上每日都坚持做收腹运动，保持健美状态。近日健身中心重开，她非常开心可以去操肌，之前宅在家中抗疫她不忘运动Keep Fit，她说：“真系做开运动嘅人好身痕嘅，谂尽唔同方法喺屋企做运动，我都会上网睇啲教学，善用屋企啲櫈物件做运动，唔想因为冇得出去做Gym而懒咗。”她指自己属于易肥易瘦，特别容易水肿，她说：“我啲水肿系唔知点解连手臂都会肿。”她觉得每个人追求的标准都不一样，她喜欢自己身形偏向较瘦或者骨感的感觉。

她曾经读过健身课程，知道饮食好影响到身形，对身形未去到好满意的她承认好为食，身上有鬼祟的脂肪，她说：“想操到肌肉线条，唔可以食煎炸、太浓味或者太多糖嘅嘢，呢啲都系我致命伤嚟，我觉得我可以再Slim啲，肌肉可以出多啲。”如果不是拍广告或者相关影相的工作，她表示会放松少少：“我宁愿做番多啲运动去食我想食嘅嘢，但系有时真系太拘束都好辛苦。”

她一直不喜欢在冷气的地方做运动，她坦言到健身室做Gym是迫不得已，因为有好多健身器材可用，她解释说：“因为我好难出汗，做运动唔出汗梗系好唔舒服。”所以她好锺意在室外运动，经常在公园跑步，她说：“跑完步我仲会用公园一啲畀公公婆婆做晨操嘅设施，做肌肉训练。”在家中她锺意做高强度间歇性运动，将心跳率提到好高，促进新陈代谢，亦能操肌，她说：“喺屋企我唔系好惊闷，因为我几宅得同独得，独系独处，唔知系咪独女，尤其系入行后工作时大班人已经柴娃娃，做完嘢我好锺意一个人匿埋，我好需要一个人嘅空间，所以我锺意跑步，觉得系一个好舒服嘅独处时间。”​