《爱．回家》玩湿身爆肌 三小鲜肉等上位！

etin

无綫处境喜剧《爱．回家之开心速递》其中一集笑爆嘴，一班小鲜肉玩湿身爆肌！朱凌凌（吴伟豪饰）、金城安（周嘉洛饰）和阿壮（焦浩轩饰）喺厕所整水喉，三位都小白色小背心上阵，畀啲水整到湿晒，透晒啲肌肉出嚟，睇到人流晒口水！仲畀金牌监制瓜姐（陈嘉佳饰）睇中，想签佢哋做星！而现实中吴伟豪、周嘉洛同埋焦浩轩都系上位小鲜肉嚟！

周嘉洛现时24岁，佢最出名就系喺《爱．回家之开心速递》演金城安。佢自小就立志做演员，佢喺香港读完中三就去咗澳洲留学，但之后因为种种原因冇继续升学，之后回流返香港，喺机缘巧合之下入读第28期艺员训练班。《爱．回家》够入屋，日日打开电视都有得睇，令到废青金城安多咗人认识，而佢都凭自己努力，喺《万千星辉颁奖典礼2019》拎到“最佳男配角”，仲系呢个奖项历年最年轻得奖者，前途无限！

“朱凌凌”吴伟豪今年21岁，十分年轻。佢就读国际学校，讲得出一口流利英文，而佢自小锺意演戏，喺父母无限量支持下，佢投考第28期无綫电视艺员训练班入行。吴伟豪大只又靓仔，个样劲似混血儿，外在因素已经赢晒，但其实佢自己都好有上进心，佢试过主动敲监制房门，自我介绍主动出击。吴伟豪仲有三个兄弟，大哥系消防队长、二哥系飞机师，细佬系模特儿，四兄弟都高大靓仔，基因劲屈机！

28岁焦浩轩喺《爱．回家之开心速递》“阿壮”弹出，佢同样高大靓仔。2019年7月，焦浩轩做埋无綫亲生仔，签咗经理人合约，喺《解决师》中饰演“猪展”一角获赞赏。另外，佢曾经同一齐主持《流行都市》嘅岑杏贤传绯闻，但被女方狠狠落闸，真系惨惨猪！​