唔怕疫情11.07香港摆酒！何雁诗爆双喜临门

etin

歌手何雁诗（Stephanie）昨日一身Sporty Look去到新城电台受访，讲到未婚夫郑俊弘（Fred）日前率先大爆二人9月的美国婚礼挞Q，Stephanie“埋怨”说：“佢成日都自己爆完唔同我讲！见美国情况严峻，都体谅身边屋企人同朋友，顾及到佢哋嘅安全，虽然Book咗场、落咗一半订，但就未Cancel，或者留番一周年再去，因为我好锺意酒庄个感觉。”

Stephanie指现阶段仍继续于香港摆酒，并自爆专登择“吉日”，实行双喜临门：“嗰日仲系爸爸70岁嘅大寿，一齐搞可以悭番，哈哈！（怕唔怕相冲？）唔怕，西历生日啫，11月7号，佢好开心㗎，本身都谂住同佢搞个大Party，既然当日都叫咗佢最亲嘅亲友嚟，咁就一齐庆祝。”笑问之后会拣同老公庆祝结婚周年纪念日、定同爸爸庆祝生日？她笑话未定案：“未必喺嗰日签纸嘅，摆酒啫。（未入纸？）未，要几时入㗎？我咩都唔识，第一次结婚咋！”讲完笑翻全场！

她并再透露早几日已透过PR朋友Book好酒店场地：“好赶急咁搵咗间喺尖沙咀，大约摆30几围，呢几日要落订，见香港情况好转，搞到个机会都大。（试咗婚纱？）未，迟啲先。”

讲回刚才于节目内容，她表示有物理治疗师坐镇，帮她检查左脚旧患：“上年左脚菠萝盖松咗，其实系打Golf嘅整亲，两条骨对唔直，就好易走位。（生活有影响？）落斜会惊啲，行山就要包住，但行完会肿到成个大苹果咁，其他都冇太大影响。”Fred有长期搀扶？她大笑话：“佢由得我死！哈哈！冇长期扶嘅，不过就帮咗我好多，叫我慢慢行。”