偷食粉丝知衰！黄子恒戒色16个月避女拍档

etin

黄子恒年多前卷入桃色风波，几乎前途尽毁，被指同女粉丝乱搞男女关系，获封“世纪贱男”！他承认已吸取教训，事发至今已“戒色”一年零四个月，断绝异性缘，即使开工与女拍档亦保持距离，避免引起不必要误会。

现年37岁的无綫艺人黄子恒，多年来感情生活一团糟，2016年被指介入歌手裕美婚姻，2018年底则被指速食内地粉丝，导致女方怀孕，事件曝光后震惊娱乐圈，同时间歌手迪子更爆曾被子恒“约炮”分别到寓所及酒店开房，因而被封“世纪贱男”。近日他有份主演的剧集《机场特警》热播中，幸好其表现赢得口碑，在他而言总算松一口气，亦没有因为自己犯错而拖累其他演员。

惊恐症未断尾

拍摄此剧期间，正是爆出他偷食粉丝，子恒受访时不讳言大感困扰：“公馀时间都好担心，会有咩篇幅出嚟，惊愈描愈黑，惟有唔好讲咁多，呢个压力系最大。（唔敢同同剧啲人沟通？）佢哋有鼓励我，但自己心情一定受影响。”当时前路未明，再加上各种情绪压力，结果被诊断患上惊恐症：“嗰段时间真系唔能够一个人匿埋喺屋企，最大影响系抖唔到气，个心成日哽住，真系影响到生命！虽然件事都过咗年几，但我仲食紧药。（后悔？）人生有好多个决定未必系最好，但冇得后悔，最紧要系吸取到教训，有得着，更加了解自己有啲乜嘢系应唔应该做。”

感激无綫冇放弃

子恒承认为事件付出沉重代价，现时面对异性有避忌：“如果真系喜欢咗对方，我都有恐惧，所以宁愿将重心放喺事业，明知（感情）自己唔系长处，就唔好执着。（有冇同嗰位女粉丝联络？）冇啦！依家拍拖都唔敢，唔谂会唔会打开心扉，就唔会去到之后嘅嘢。（轻松咗？）少啲杂念，对身边人都好啲。”并感激无綫没有放弃他，惩罚过后给予机会：“角色位置上系有少少分别，好似《爱美丽狂想曲》、《踩过界Ⅱ》变咗客串身份，当然处分都系合理，作为公众人物要承受，希望未来日子，大家觉得我有改变。”

为怕别人因其过去而误会自己，即使开工面对女拍档，子恒自动波保持距离，例如与同剧的蔡思贝、汤洛雯、邓佩仪与王卓淇等，私下不会有互动，反而对手戏最多是人妻孙慧雪。他表示与阿雪相识十多年，今次才首次合作演夫妻，当中不乏亲热戏份，感觉对方没半点忸怩：“相信佢会同另一半识得沟通，作为演员希望做到本身场戏要有嘅效果，同埋角色上有啲场口真系需要嘅。”至于他今次饰演特警组阿头，正气凛然，角色相当立体，令他有很大发挥。

王卓淇：同佢冇乜交流

黄子恒于《机场特警》中与不少女艺人有对手戏，跟孙慧雪饰演夫妻，王卓淇则演他前女友。对于子恒拍摄时受桃色事件影响心情，更要避女色，王卓淇表示：“嗰阵佢冇乜嘢，唔觉得佢有避忌。佢系一个好Nice、好好嘅前辈，但因为我戏份唔多，所以大家冇乜特别交流。我初初入行嗰阵，第一日拍节目《安乐蜗》，佢做嘉宾，我拍剧嗰阵同佢讲番，佢都话记得。”

至于孙慧雪表示：“子恒佢好好，好专业，因为呢套剧系我生完BB后拍嘅第一套剧，好紧张，佢不断鼓励我，仲话‘可以㗎！你自然啲啦’，所以我哋演得好有默契。”