吴启华传月花22万港币 为11岁女铺路做网红

etin

艺人吴启华与前妻石洋子育有一名女儿吴熙儿（猪猪），有女初长成，年仅11岁嘅猪猪愈大愈靓女，人仔细细已甚有表演欲，不时喺个人社交网大晒琴技，又识自拍P图，嘟嘴扭腰表情多多，就连化妆都难唔到佢，多才多艺。目前微博Fans人数已超过2500，由于受到父母影响，自小已对娱乐圈充满憧憬，最近更参与拍微电影，明显有意向网红之路出发。

有指锡女锡到燶嘅吴启华，未能时常陪喺猪猪身边，因此对阿女有求必应，每月豪花20万人民币（约港元22万），畀前妻同囡囡做生活费，务求令女儿开心，认真廿四孝爸爸！两父女感情相当不错，猪猪亦曾上载与吴启华嘅亲密合照，为爸爸贺寿，十分乖女。

对于传闻，联络上启华，佢话：“夸张啫！几多钱生活费就唔讲啦！但做男人系要有呢个责任。”问到囡囡系咪有意入行？佢就话：“囡囡长大啦，有佢自己谂法，佢想点我都控制唔到，不过，佢好乖，有乜嘢事都会同我商量先。（囡囡入行就升呢星爸？）如果佢真系做演员都有着数嘅，知名度方面都打个底先，但我都系建议佢多啲学习，大个先谂做嘢啦！”​