《飛虎》播放量過億 預告山聰死得慘烈

邵氏網劇《飛虎之潛行極戰》昨晚於優酷及myTV SUPER獨家上線首播，而成績亦相當理想，昨晚一連播兩集，開播一小時，播放量已達一億，一班演員吳卓羲、梁烈唯及陳山聰等對此成績都相當滿意，坦言對劇集的收看率及收視都相當有信心。

有信心新劇播放量高收

吳卓羲於劇中是一名O記警員，而昨晚播映時，他更親身上陣拍攝一場一shot過的跳天橋戲份，可謂搏晒命。卓羲接受東網訪問時表示對首播成績感滿意，更有信心表示之後會愈來愈好，他謂：「非常有信心，尋晚喺日本拍緊嘢嘅三哥（苗僑偉）都好緊張，問播成點？我覺得成套劇好有電影感，比一般嘅拍攝手法唔同，今次導演有經驗之餘，演員都好搏命。」

梁烈唯新造型夠搶

而飾演讀過心理學的壞人梁烈唯今次造型相當突出，劇中他更對臥底陳山聰使出殘忍手段加以傷害，唯唯接受訪問時謂：「今次個造型好特別，好多謝個美術總監同髮型師，大家配合得好好，對個角色都好有幫助。今次呢個角色係我咁耐以嚟第一次做，亦係最Fit嘅一個角色，拍時狀態都係最fit嘅！其實個角色唔係好奸，佢係相信佢認為係真理嘅嘢，現今嘅人唔係好知自己做緊乜，佢要將個真相帶番出嚟！」

山聰「死」得慘烈

而飾演苗僑偉臥底的山聰之後會死得慘烈，山聰指不少網民都很驚訝他為何這麼快死，大家都很喜歡這個角色，他謂：「雖然咁早死，但係都值得嘅，觀眾都好鍾意呢個角色，希望大家都會記得呢個角色。拍時樂小姐（樂易玲）都話想安排多啲戲份畀我，但我當時真係冇期拍，因為拍緊《逆緣》。呢個角色都幾好玩，我尋晚返屋企都有睇，個劇好好，希望觀眾繼續支持。」

Summerday

哈哈哈哈哈哈哈哈哈哈哈哈哈哈哈