【肥得嚟好靈活】細細粒地獄式特訓 拉筋拉到嗌救命

細細粒（陳嘉佳）上年在內地綜藝節目《喜劇之王》中扮演「暴飲韓紅」備受關注，網民除了讚她扮相維肖維妙外，更對她可以在短短數十秒內KO兩公升水大感驚訝。由於細細粒表現拼搏，最近獲內地中央電視台賞識，誠邀她親臨全新綜藝節目《星光大道》現場大展身手，並下令她大跳勁舞。

雖然細細粒平時予人「肥得嚟好靈活」感覺，但其實運動細胞欠奉，為了跳好自己隻舞，她專誠找來排舞老師進行「地獄式特訓」，短短數分鐘的舞步，由早上8時排至晚上10時，期間更要進行「攞你命三千拉筋熱身」，排舞老師為了增強細細粒的柔軟度，著她半趴在地上然後將手腳拉至最盡，由於動作難度頗高，加上平時懶做運動的細細粒「日久失修」，痛得她全程叫苦連天，令現場所有工作人員均笑翻肚皮。

事後細細粒笑言練完隻舞，痛足半個月：「我雖然係肥，但我覺得自己都幾靈活嘅，哈哈哈！不過可能我平時真係少郁嘅關係，經過嗰日地獄式特訓後，正式錄影嗰日我已經周身骨痛，頂硬上表演。之後返到香港，啲手腳同腰直頭酸痛到行得行唔到，除咗落街食飯，幾乎喺屋企冇郁過。雖然痛足幾日，但我真係好開心可以參與呢個節目，希望今次都可以令觀眾朋友睇得開開心心啦。」