|
发表于 2018-3-31 12:59:35
|
显示全部楼层
ViuTV幾套劇一齊開,當中有啲已經拍完煞科喇,包括咗《VR驅魔人》同埋由孔令政 James Hung製作嘅《Plan B》。關於《Plan B》,之前嘅報道一直都將焦點集中喺演員方面,到底個故事內容係講咩呢?今次搵到集監、編、導一身嘅James講兩句,佢喺答案當中不斷提到今次係用電影嘅準標去拍《Plan B》,搞到我好期待呀。
------------------------------------------
問:睇報道,故事有報仇、黑社會、強姦咁,內容大致係點呀?主要想傳達咩訊息?
答:《Plan B》描寫新世代嘅江湖惡鬥,戰場係背景獨特嘅元朗。由一宗弔詭綁架案作序幕,飾演富商情人嘅吳嘉熙 (Cheronna) 畀人標參。案件局中有局,陰差陽錯驚動官商鄉黑各大勢力,引發層層黑幫恩怨廝殺。其實人生充斥未知之數,我哋企圖掌握命運而深謀遠慮,但最終都係「為情執着」、「感情用事」。
------------------------------------------
問:呢套劇會唔會都好似你之前自編自導嘅電影《第七謊言》咁黑色呢?啲人物係咪一樣生活喺高壓當中?
答:無錯,《Plan B》延續我嘅黑色犯罪風格,但人物設計同故事世界會更加接地氣。《第七謊言》所講嘅係「求存」,而《Plan B》講嘅係「執着」。由王宗堯飾演嘅社團小混混,以至田啟文飾演嘅新界土地霸王,每個人物都被「執着」圍困,將自己迫入絕境。
------------------------------------------
問:《Plan B》呢個劇本係新寫,定係好似《第七謊言》咁一早寫好咗?如果係一早寫好,點解會拍呢個劇本呢?如果係新寫嘅,又有咩觸動你寫呢個故事?
答:《Plan B》劇本用咗一年時間完成。當初得到魯生(ViuTV台長魯庭暉)邀請創作新劇,得到好大嘅信任同自由,我想花多啲資源喺劇本同製作上。《Plan B》嘅骨?就係小人物挑戰權勢。希望每個細節都畀到觀眾驚喜,有連續追看嘅意欲。我哋堅持「每集都當係大結局咁度」。期望每一集都係獨當一面嘅作品。本地好耐冇一套剛陽味爆棚嘅江湖劇,我一直期待呢個嘗試。
------------------------------------------
問:由TVB跳出嚟電影圈,依家又接拍返電視劇。你覺得如何呢?拍電視劇同拍電影對你嚟講有咩最大唔同?
答:近年從TVB走入電影圈嘅導演好少,行家會好奇我嘅背景同經歷。大台對我嘅「養育」令我對電視劇有好深嘅情義結,希望做有誠意嘅作品。今次一手一腳監製、編劇、導演整個劇,令我諗返起好多喺TVB嘅回憶,認真體會到由零打造一部連續劇嘅艱巨性。對我嚟講「說好故事」最重要,我唔識去區分「電視手法」或者「電影手法」。我堅持運用電影嘅分鏡頭、電影嘅節奏、電影嘅拍攝規模去製作《Plan B》。
------------------------------------------
問:你自己覺得《Plan B》最好睇係咩?有咩推介畀觀眾呀?
答:《Plan B》唔單只係 ViuTV 首部警匪江湖劇,亦係近年罕有嘅「男人角力戲」。20集嘅劇力都好豐富緊湊。一眾實力派男神之間嘅演技大鬥法,絕對係搶眼亮點。王宗堯、陳啟泰、陸駿光、田啟文等等,每個演員都衝破固有形象,挑戰從未演過嘅人物。《Plan B》嘅幕後團隊全屬電影班底,攝製水平達到電影標準。希望大家會睇到我們嘅誠意!
------------------------------------------
問:個演員組合好新鮮。邊個同你最有花火呀?
答:當中最深刻應該係Ken哥陳啟泰。我哋兩個首次碰頭時,佢主動同我握手話非常喜歡黑幫話事人呢個角色。佢驚訝點解我會搵「百萬富翁」演大佬。我係睇 Ken哥嘅戲長大,覺得佢可以演充滿黑暗面嘅反派。 我哋喺拍攝前一直討論演繹嘅方向。 臨roll機之前, Ken哥仍然爭取時間設計人物嘅言行風格同口頭襌,非常過癮!
------------------------------------------
問:依家開始後製?咁幾時有得睇呢?
答:《Plan B》嘅後期製作必須跟從電影規格。由調色、配樂、聲效設計至混音都需要花較長時間。預計2018年初先至會同觀眾見面。
------------------------------------------
問:嚟緊有咩搞作呀?
答:完成《Plan B》拍攝後,我除咗要監督後製過程,明年亦會緊接開拍一部偵探電影。劇本已經完成,初步演員陣容亦已落實。電影會重塑70年代尾嘅社會氛圍,所以需要用大量時間同心血搭建大型廠景。我相信電影人付出嘅心機,觀眾會感受得到。 |
|