【生死一線】何佩瑜拍水底戲差啲爆肺

近期何佩瑜（Jeana）為咗配合新片要增肥15磅，對於身材出名好嘅Jeana嚟講都幾大犧牲，不過對比起之前佢拍嘅一套電影就差得遠，唔識潛水但係要喺水底拍戲，結果因為太驚恐緊急上水差啲搞到爆肺而死！

水底拍戲困難重重

Jeana參演嘅電影即將喺馬來西亞上映，不過有工作在身就冇時間過去做宣傳，佢喺社交網回憶番當時拍攝嘅點滴，表示套戲喺台灣墾丁拍，好多場面都喺水底，雖然佢唔識潛水，不過一向勇於冒險及嘗試嘅Jeana冇退縮，期間要面對大浪嘅紅色警報同埋天氣寒冷狀況，仲出現嘔吐和抽筋等情況，又畀水母不停地「炸傷」皮膚，真係諗起都戥佢慘！

恐懼侵佔面對死亡

而當中最難嘅一個場口，要潛入10米水底拍攝，吸飽氧氣就roll機，唔夠氣就再吸咁不停循環呢個動作，Jeana透露因為喺水底冇戴潛水鏡乜嘢都睇唔到，加上新手潛水嘅關係，到達10米深嘅水底冇耐就畀恐懼侵佔，唔能夠協調自己嘅呼吸兼不停掙扎，自然反應之下想極速衝上水面，當時Jeana畀教練捉住唔畀佢向上游，原來係因為喺呢個水深嘅地方吸緊氧氣，突然衝上水面會有機會爆肺甚至死亡，當時情況都好驚險，好在最後都冇事！Jeana安全上到水面之後，即時瘋狂爆喊，仲話係第一次感受到同死亡係咁近，經歷過呢件事之後，Jeana除咗驚恐之外都有得着，就係完全感受到生命嘅脆弱，從而學識咗要珍惜。

做演員為咗有好效果靚畫面，拍戲時經常都要玩命，就算好似吳京呢啲出名好身手嘅動作演員，之前佢主演全球大收超過67億嘅電影《戰狼II》，其中一幕要一口氣喺水底打鬥6分鐘，見慣大場面嘅吳京都話當時不停飲水真係差啲死，連專業動作人員都咁講，可想而知唔識潛水嘅Jeana面對緊幾大難度！