鍾意電視撈飯的觀眾終於有得揀!港視不獲發牌、亞視末路,令香港觀眾過去幾年一直飽受無綫「一台獨大」悶局。不過,隨着「小小超」李澤楷旗下電訊盈科成立的新免費電視台ViuTV 4月強勢開台,挑戰無綫地位,令電視業再起風雲。
據了解,亞視4月1日被釘牌後,將於當晚11時59分59秒終止訊號,接收亞視半條數碼頻道並經數碼頻道99台廣播的ViuTV,翌日會先進行測試,4月3日試播,然後待至4月6日正式開台。為一新觀眾耳目,ViuTV主力製作真人騷娛樂觀眾,並以最具睇頭的《跟住矛盾去旅行》,及由一班圈中靚女真.埋身肉搏的《G1格鬥會》在開台當日作為頭炮。
《跟住矛盾去旅行》乃邀請政見、社會地位完全相反的矛盾組合到世界各地旅行,除《100毛》創辦人林日曦與立法會議員蔣麗芸到韓國首爾、邵音音與戴夢夢到印尼、連詩雅與葉蘊儀到意大利佛羅倫斯外,更有早年宣佈出櫃的何韻詩與虔誠基督徒高皓正到愛爾蘭都柏林,以及親中的劉夢熊跟學民思潮成員周庭等矛盾組合。日前出發到愛爾蘭拍攝的高皓正,前日透過WhatsApp回應說:「香港有個新嘅免費電視台一定鼎力支持啦!點解會參與?同何韻詩去旅行喎,你一世有幾次機會呀?」
具話題性的真人騷還有《同2047特首上堂》,邀請到馬浚偉、卓韻芝和鄒凱光等,身穿「小學雞」校服重拾書本跟小學生一同上課,體驗現今小學生學習氣氛;另外又有交換媽咪作比賽條件的煮餸比賽《換咗你阿媽》,參賽者母子或母女入圍後要交換母親到日本、泰國等地作煮餸比賽。
據悉ViuTV還會一反過往觀眾在固定時間收睇新聞的傳統,將新聞時段安排在無綫播劇集的8時非常黃金時段,硬撼無綫緊接《愛.回家》後推出、由黎耀祥、毛舜筠和陳國邦孭飛的全新處境劇《八時入席》。這個新聞時段安排,更是過去數十年電視史前所未見。
對此ViuTV製作部副總裁金廣誠在電話中說:「暫時未定,我哋冇諗住打任何人,只不過想畀大家有唔同選擇,同埋新聞未必一定要喺晚上6點半睇,我哋想有啲嘢同人哋唔一樣。」
儘管ViuTV以真人騷掛帥,但為照顧愛煲劇觀眾,他們亦有邀請無綫舊將林保怡、周家怡、盧海鵬和楊淇等一眾小生花旦和實力派拍攝劇集,及購買日、韓最新鮮熱辣劇集播映權,又安排配音作麗音廣播,讓香港觀眾自行選擇。事實上,無綫綜藝節目近期亦不斷求變及加強部署,包括近日推出一個嶄新的親子節目《湊仔攻略》,及安排鄭裕玲和組合農夫拍攝一個講述世界各地食材和奇趣食物的飲食節目《Do姐有問題》等等,明顯是為迎戰ViuTV作準備。
|