方力申做爸爸极大感受 揭爱女名字藏家庭密码

etin

艺人方力申（小方）去年12月宣布爱女Isla出世，同太太叶萱（Maple）升做父母，如今已为人父3个月，极多感受嘅佢决定尽诉心中情，昨日（26日）分享同爱女温馨合照外，大谈为女儿改名“爱嘉”背后重大意义。方力申回顾过去一年结婚生女嘅人生重大转变，佢坦言似打机咁难度升级，单身时觉得自己生活及工作安稳、成绩不错，但结婚后发现维持感情同实践一生一世承诺系需要实际行动。自囡囡Isla出世后，佢深刻体会到“养儿一百岁长忧九十九”道理，同太太一同面对各种担忧与计划，不过佢都对未来充满期待，认为结婚生子系将“我”变成“我们”嘅过程。

方力申又详细解释爱女中文名由来，早前佢就解释过英文名Isla，系英文“FAMILY”拆解而成，正正就系佢一家人名字缩写：F代表方（Fong）、A代表Alex、M代表Maple、I代表Isla、L代表未来嘅BB，Y代表叶（Yip）。而中文名佢选用“爱”字，系因为家中挂有“爱”与“家”书法，象征家庭系佢生活重心，同时“爱”普通话发音同Isla相近；“嘉”字则由好友建议，发音与“家”相同。小方更自爆心思︰“既然中英文意思都咁夹，所以就乾脆叫佢爱嘉啦！Isla 爱嘉，爸爸今日嘅愿望就系希望妳能够一生平安、健康、快乐！（其他就随缘啦）”