陈家乐拍情欲戏唔怕另一半诈型 自爆一早同连诗雅备案

etin

艺人陈家乐及廖子妤（Fish）主演英皇电影《像我这样的爱情》昨晚于铜锣湾举行首映礼，两位主角获另一半连诗雅及卢镇业现身捧场外，家乐经理人公司老板杨受成及一众同门包括汤怡及何佩瑜等齐齐出席支持，而其有份成立的足球队好兄弟马志威及林耀声等亦现身力撑，场面相当热闹。Fish与家乐于戏中分别扮演脑性麻痹患者及性义工，相关题材以往未曾在港拍摄过。两人受访时提到电影早前出战“东京电影节”，观众反应理想：“佢哋问好多专业嘅问题，中间要通过翻译，问到唔够时间回答及解释。（有冇问你哋情欲戏？）又真系冇，可能因为系影展，佢哋都系资深嘅电影迷。”虽然电影列为三级，但家乐不担心会影响票房：“呢类戏如果有兴趣嘅话，要睇嘅始终会睇。”谈到会否担心另一半的反应，两人异口同声表示不担心，家乐更坦言早已向太太备案：“反而之前我同Fish喺日本睇戏时就觉得尴尬，因为大家坐埋一齐，都冇谂过拍出嚟嘅画面会有呢种效果。”当问到是否希望再合作，Fish表示：“下次想大家合作拍喜剧，或者超悲剧，悲到尽，一系一齐劈友，哈哈！”
至于两人主持访谈节目，并邀来连诗雅及卫诗雅作嘉宾，家乐说：“电影公司负责邀请嘅，其实我好尴尬，好惊讲错嘢出唔出到街，成程都好紧张，仲搞到脚抽筋！”Fish补充指自己仅向嘉宾问有关爱情观问题，发问一点也不尖锐。对于卫诗雅失落金鸡影后，身为好友的家乐未有致电慰问对方：“见佢都好开心喎，其实能够入围都已经好荣幸，同埋导演陈茂贤仲要攞编剧奖。（佢话想《破·地狱》团队再开新戏，你会唔会叫佢预埋你？）唔用横手、关系逼佢，我觉得应该正常途径，好似试镜咁，我会努力争取嘅。（咁想唔想凭《像》片向奖项方面出发？）想就想，但我比较享受过程，如果大家觉得我做得好嘅话，可以畀多啲鼓励我就好。”连诗雅力撑丈夫陈家乐，刚从马来西亚港返港的她坦言：“结咗婚就系另外一个阶段，所以想身体力行多啲去支持老公，同样地佢都好支持我。”
谈到家乐于戏中与廖子妤的情欲戏码，她坦言：“我真系第一次睇佢嘅感情戏，所以呢套戏对佢嚟讲系大突破，对于我嚟讲都系。我畀佢嘅工作自由度好大，佢都会坦白咁同我交代，但以前我睇佢嘅戏系冇亲热场口嘅！（今日妳咪跨进咗一大步？）系呀。（点解会拣呢套支持？）因为呢套戏系佢入行以嚟暂时最大嘅挑战！（睇佢床戏？）我唔会聚焦喺嗰度啰，不过呢种题材其实好有意思，系值得关注嘅社会议题，所以我要放低自己嘅私人感受。”Shiga自言自己已有一段时间未有拍戏，目前都在等候演出机会。问到倘若有类似今次家乐的剧本邀请她演出，会否预测到家乐的反应，她满有信心回答：“佢都会好畀自由度我，我觉得佢冇问题，佢曾经讲过可以好理性地跳出嚟、以观众嘅身份睇我嘅作品，之前我演舞台剧同黄浩然饰演一对，佢都以专业演员嘅角度畀意见我，反而我仲未可以完全跳出嚟！（认系呷醋太太？）我以前真系系呷醋女友，依家还好，可能因为有咗个女啦，反而老公会话我成日挂住BB，好似我昨晚落机返香港，个女今朝净系要爸爸，我有啲呷醋㗎。”