佘诗曼自爆一放假就癫 忽认恋情：冇停过拍拖喎！

etin

视后佘诗曼近日接受访问，谈到过往演出剧集中最喜欢的角色，阿佘坦言每个角色都要锺意才能演得出来，否则不会接拍：“不过讲我想成为边个角色啦，我最锺意《公主驾到》，首先系公主，而且好正，又任性又刁蛮又靓，又有好多人锡，但我现实生活唔可以咁任性，我系隐藏版（任性），但佢系外露版，如果现实中系咁好正，最后又搵到真心相爱嘅驸马，系好完美嘅事。（你锺意童话故事？）个个女仔都系。”至于最富挑战性角色，她则认为是最近拍摄的《正义女神》：“剧中我系饰演法官，喺《新闻女王2》之前拍摄，系一个特别情况，当时谂住全程投入准备《新闻女王2》，点知有个咁好嘅角色同剧本，我要好短时间将自己去调整，之前已经入晒脑系Man姐（《新闻2》角色名），依家要洗脑，完全唔可以有Man姐嘅影子。”


另外，问到阿佘若不当演员会做甚么时？阿佘即时被考起：“哗，点知呀，呢个系命运安排。”她笑言：“我谂我会做咗一个妈咪啰，我经理人拧晒头喎，冇嘢可以做到咁惨？因为我系唔可以做一啲日日一样，朝九晚五嘅工我系唔得嘅，咁可能做妈咪都未必得，我唔可以停落嚟，我一放假就癫，放得太耐假就觉得好无聊，人生冇晒意义同好废，周身唔聚财，可能我会系旅行嗰啲美食家。”最后讲到感情问题，阿佘竟然表示：“我冇停过拍拖喎！”及后才解释：“我系同我嘅工作谈恋爱，每一个剧集就系我嘅对象，好投入同去揣摩，都已经好多精力，系我去爱上我个角色，其实个过程系好浪漫。（会唔会人格分裂？）我系有，其实我系唔系好正常，我觉得演员都唔系好正常，正常人做唔到演员，你成日一时一样，点样会系一个正常人。”