[新闻]港視《童話戀曲》唔掂收視急挫 《選戰II》開拍無期

Cinda

一台獨大局面勢難改，聽日就係亞視部份股權嘅招標期限「死線」，如果仲未有「白武士」打救，就要面臨清盤命運。另一邊廂嘅港視（HKTV）亦都唔樂觀，去年十一月開台，王維基宣稱今年二月將重啟新節目製作，可惜最近播出的《童話戀曲201314》未能承接《來生不做香港人》餘勢，收視急挫，每日平均點播收睇嘅用戶由前周公佈嘅十二萬七千跌至上周嘅十萬零五千，急跌17.3％。

有消息指王維基擔心「有出冇入」，已將計劃延後至五月，但內部員工覺得唔太樂觀。盛傳重啟後首部開拍嘅《選戰II》總導演黃國強，今日喺電話中承認收視未如理想，佢話：「梗有少少失望，但明白嘅，呢個平台唔係咁容易去睇，同理想平台有距離。」佢約滿港視後將於二月返新工，佢話：「相信冇可能二、三月會拍到，智叔啲期都唔得。但我都同王生講，如果遲啲真係開拍，我會盡量度期。」

為港視指《選戰》的李心潔今日在尖沙嘴出席活動，她直言未決定是否接拍第二輯:「都要先睇劇本。」

而唱《選戰》插曲《I'll Be There》冒起嘅陳詩慧亦於上月底約滿港視，好彩獲蕭定一垂青，同佢簽約三年做張智霖（Chilam）師妹，詩慧今日喺電話話：「主要做音樂，自己包辦作曲、作詞同主唱，仲會幫電影做配樂，感覺好充實。」詩慧直言好希望同同公司人合作，佢話：「有機會都會幫欣宜同雨僑寫歌，但如果可以，好想同王宗堯唱《I'll Be There》合唱版，我聽過佢唱歌都幾好聽。」

很想看《选战2》阿，不要不拍阿