张达伦笑囝囝演戏表情太Over 冇乜演艺细胞

etin

艺人张逹伦、梁丽翘、可岚及郑文等，昨日（7日）一家大细出席卡通片首映礼，其中张达伦囝囝张凯硕（Zachary）到场后表现兴奋，不停与人偶耍乐及拍照，样子搞笑。

达伦透露自己刚完成电影拍摄工作，刚巧配合囝囝放暑假，会带他去打波及游水等，争取亲子时间：“佢咁好动，我都想去样样试吓。（考虑畀佢做吓童星？）其实佢细个嘅时候，都有拍过吓广告，试过有朋友开戏，想搵佢客串，点知叫佢做一个简单表情，但表现太over，佢都系唔适合拍戏。”

达伦又指19岁继女早前从澳洲回港一个月，一家终可共度天伦：“佢有成两年几冇返过嚟，今次真系好开心，走嘅时候都有喊。佢成绩唔错，起初想读护士，依家又转科读建筑。（谂住留喺嗰边？）佢大个女等佢自己决定，可能唔返嚟，嗰边环境舒适啲。（你再追多个？）都想凑成个好字，不过小朋友嘅嘢讲缘分。”