疫情严峻,依家全面禁堂食,唔少人都去超级市场储定粮,煮得一手好菜嘅肥妈Maria Cordero,日前拍片带大家去参观佢超夸张嘅厨房,有成4个雪柜,3个焗炉,9层高嘅地方放调味料,亦已储定2个月食物足够一家人食。肥妈拍片上网,解剖佢嘅特大厨房,2个雪柜摆落腌好咗嘅肉类、蔬菜、牛奶、蛋糕等,仲话仲有一个大冰柜放咗喺出面,攞啲雪藏食物。又有一个小嘅雪柜专放调味料。肥妈话因为经历过1967年暴动,当时真系冇嘢食,自此之后都会放定1个月嘅粮,所以有大量乾粮罐头、米、米粉、面及意粉等,以备不时之需。
片中见到肥妈嘅煮食用具齐全,除咗2个炉头、仲有唔同类型嘅电器,焗炉、蒸焗炉、食物风乾机等。又有大量煮食工具,几十个暖水壶、烘焙用品及茶叶的柜筒等。之后仲有一个9层高嘅柜,柜上面有不同大小嘅盒,放唔同嘅香料、花椒八角、芝麻、蜜枣、陈皮、片糖、雪耳等。肥妈教路要用盒摆好每一款食材,再贴上标签,咁就更加容易搵。​
|