新冠肺炎疫情失控,政府昨日公布加“辣”防疫措施,当中包括全港食肆全日禁堂食、禁聚令收紧至2人,措施由周三(29日)凌晨起生效,为期7日,对于新措施,众星反应都差不多,齐心留家抗疫!
​对食冇要求 张秀文嗌定外卖储粮 张秀文指禁聚令四变二,对她影响不大,因她为了保护妈咪,已近三个月没见过对方:“自从母亲节之后,已经冇同屋企人聚餐、见面,都系靠电话或电话群组联络同联系感情,主要系因为妈咪住喺禄泉楼(曾有多宗确诊个案)附近,再加上TKO都系高危地方,所以为咗安全起见,都冇去探阿妈,以免交叉感染,而阿哥、家姐因有小朋友就更加减少见面,唔想有传染;因为依家我自己住,所以好多时都一个人食饭,已经习惯咗,会叫外卖或者自己整,依家全日冇咗堂食,咪叫多两、三个外卖储喺屋企,我对食冇乜要求,但求生存!”
萧正楠帮黄翠如补骨胶原 萧正楠(阿萧)亦跟张秀文一样,已少见了屋企人:“以前同妈咪一个礼拜饮一、两次茶,依家真系唔敢,因为年纪大,好危险,我都叫佢尽量留喺屋企,少见啲都冇办法,所以,禁聚令改为两人,对我影响唔大。” 经常会下厨的阿萧,在疫情期间,更研制了不少菜式,他谓:“呢排喺屋企煮多,调味料摆到成柜都系,多到畀老婆(黄翠如)闹,乜嘢醉鸡汁、老抽、喼汁都有,好多时睇网上食谱都系加呢啲酱汁落去,冇就做唔到。好似早两日我研制咗一味鸡脚畀翠如食,跟网上食谱整,落好多调味料,又酸又辣咁,呢味小食要放雪柜腌一晚入味,见佢呢排开工咁辛苦,畀啲骨胶原佢食,等佢愈拍愈靓,佢食完话可以再辣啲,但整体味道都收货。”
简淑儿沙律焗蛋糕最耍家 简淑儿由于父母在美国,她与同住的家姐很少出街,所以禁聚令对她来说没有太大影响,而留家的日子,她最爱下厨,更会将美食跟友人分享:“最近食得最多系牛油果鸡胸沙律,啲人可能觉得沙律唔饱肚,但我呢个好饱,花十分钟就可以整好,唔需要调味料已够味,有时可以加烚蛋或者意粉或黑麦包,有晒你所需要嘅营养,有蛋白质、健康嘅脂肪同纤维,快靓正!同埋,我近排有试焗蛋糕,之前送咗个芝士蛋糕畀陈婉衡贺佢生日,另一个朋友生日我花咗四个钟焗咗两层蛋糕,上层系焦糖布甸,下面系芝士蛋糕,系我最满意作品。”
Eunice网上学整日式丼饭 “3日2夜”女神陈诗欣(Eunice)对食肆全日禁堂食,表示:“其实唔使开工嘅日子,我都系自己煮嘅,前排我都有叫外卖,但因为依家多咗好多染疫群组可能系啲餐厅,我就唔放心,就次次外卖完返嚟,我都要再煮一次或者喺微波炉叮一次,不过,我都觉得好麻烦,最后决定自己煮啦,好似仲快啲。”谈到疫境练出的拿手菜,她指最近正钻研日式丼饭,例如牛肉丼、亲子鸡丼之类,她说:“我系网上睇食谱,点解令我想煮呢,因为我本身以为好难,系睇到组合Super Girls成员Jessica,佢又系抗疫,前排留喺屋企教人去煮牛肉丼饭,见佢用电饭煲煮牛肉丼饭劲成功,我就跟住佢照办煮碗买晒啲材料去整啰。”
谈到禁聚令,生于四口之家的她,除了父母外,还有已婚及生了小朋友的胞姐,对于新禁聚令将实施,Eunice不讳言早已和家姐减少见面:“因为我在职工作嘅家姐有小朋友,而我又成日接触唔同嘅人,为咗安全计,暂时唔见住先,等疫情过后,再一家人食饭啰。”又指因妈咪常挂念外孙,故此惟有改用facetime和外孙见面解相思。问到如和朋友出街又遇熟人时会怎办,她谓:“叫身边朋友行开少少先,等我同第三位朋友倾两句或say hi啰。”
陈欣妍秘技整牛扒锁住肉汁 同样因很少外出食饭,所以新禁聚令对陈欣妍来说,亦没太大影响,至于留家,她最爱整牛扒:“最近多咗时间留喺屋企食饭,通常会去网购,买咗好多牛扒,方便煮又有蛋白质,我仲有一个秘技,就系煎完之后,唔会即刻切嚟食,会等旧扒抖一抖,锁住啲肉汁先。”
杨千嬅提醒大家:一个人出街都要做足防疫措施 杨千嬅认为现时收紧禁聚令措施,全因现时疫情正处于严峻阶段,令人心惶惶,不过她觉得无论禁聚令可容许几多人同行,最紧要是每人谨守防疫意识:“就算一个出街都要戴口罩,最好都系尽量避免外出,我成家人都有呢个意识,我个小朋友都转咗做online class,虽然都会有第二样压力,但都好少出外㗎啦。”她指目前乃非常时期,大家必需齐心防疫,一定要戴口罩、清洁洗手,同时希望政府可有再进一步措施控制疫情,并冀盼疫情减退,呼吁:“大家齐心协力去过呢一关。”
林盛斌最担心朋友过唔到呢一关 一家六口的林盛斌,对于收紧禁聚令变成二人表示:“好似话同住处嘅家人系可以豁免,不过呢段时间除咗我同太太个别有时要出外工作之外,我哋全家人都唔会一齐出街,都系留喺屋企,所以对我冇乜大影响,反而我身边好多朋友做饮食业嘅,我就真系好担心佢哋未必过到呢一关。”
|