|
一个30岁的女人,可能已谈婚论嫁,好命的都做了母亲、少奶奶,不过,现年30岁、堪称“圈中小富婆”的龚嘉欣,有车、有楼、有铺头,现时处于搏杀期,不甘心就此结婚生仔做少奶奶,扬言下一个目标是向“视后”进发。
龚嘉欣今年刚好踏入娱乐圈10年,坦言是一个关口。现时后生一辈,不少到30岁仍然一事无成,户口得个“零”,她却于这个年纪以900多万买入人生第一层楼,以及在马来西亚开火锅店做埋老板。女人,30岁可能已谈婚论嫁,生儿育女,但嘉欣更喜欢工作,扬言下一个目标是攞视后。
压力大到“停经”
年初,嘉欣买楼、开铺,她说:“我好怕搬屋,以前搬屋搬到喊,一路都想有个安乐窝,但唔容易,系有份压力喺度,尤其是现时经济咁样,好多嘢唔喺自己控制范围,尽力做好自己。”堪称“圈中小富婆”的她公开储钱秘笈,大爆由十多岁做模特儿开始,就有储蓄半份粮的习惯:“我有两个户口,永远只会用A银行嘅钱,B银行嘅钱我系唔会用,提款卡永远唔带出去,万一唔够用,先会喺A搣少少过去,我净系锺意储钱,我唔识投资,我系一个好保守嘅人,有人叫我买股票,我唔买,只会摆定期,我又唔会有好大物质欲望,自己好少买衫买袋,一条牛仔裤着几年。”
她指这个“30岁”不容易,在马来西亚开火锅店,坦言压力大到3个月没有经期,入行10年,令她成长不少,但她居然说:“其实我觉得呢10年我冇乜大改变,以前唔识谂咁多,依家会谂点可以再勤力啲。(负担大咗?)今年30岁系一个关口,冇借口再话自己系细路女,为人为自己都要谂多啲,我嘅事业由攞咗‘最佳女配角’之后,应该要行上多一级。(有咩目标?)梗系攞视后啦!(《杀手》有冇机会?)呢部剧我付出咗要做嘅嘢,对得住自己、对手、监制。”
投入黎耀祥“父女恋”
嘉欣于现时热播新剧《杀手》中饰演杀手,可谓搏到尽,她坦言拍前不知如此辛苦:“本身自己手脚唔系咁灵活,有啲动作要好努力去做,剧中同陈豪、黎耀祥好多对打戏,就算打到断手指筋,全身瘀伤都唔识惊,幸运对手系祥哥(黎耀祥),拍摄时佢好迁就我,令我好容易投入到。”说到与黎耀祥年纪相差廿多年,剧中有段“微妙”爱情,问她能否投入?嘉欣说:“梗系投入到啦!我谂真系经验!(父女恋喎?现实生活中接唔接受到?)应该唔得嘞!暂时我想像唔到,发生机会系好低。(未试过有呢啲‘熟男’追求你?)梗系冇啦!我爸爸都系五十几岁,对方大过我爸爸我接受唔到啰!做戏就OK嘅!”
问到情愿拍喊到呼天抢地的戏还是打到落花流水?她说:“两样都好难,拣唔到,其实今次都好多喊戏,监制要求唔同咗,要嗰一下先可以喊,讲完嗰粒字先可以流眼泪,我又做到喎!自己都有份交代,亦都成长咗。”
|
|