年尾擺酒結婚 李偉健被女友下令封口

在處境劇《愛·回家之愛心速遞》中飾演Terry的藝人李偉健現身拳賽記招支持朋友，他透露近年忙拍劇，所以比較少打拳及操肌，他說：「我冇試過打拳賽，我都好想，但十字韌帶傷過幾次，所以唔可以比賽，都因為咁唔開心咗好多年。」

另外，李偉健將與女朋友拉埋天窗，他表示剛去完日本拍攝婚紗照：「我遲啲都會放相上社交網站，但會用個哈哈笑遮住女朋友個樣，因為佢比較怕醜，我都有同佢講，遲啲擺酒都冇得避，而且我又唔係周潤發，冇人會認得。」問到好日子，李偉健只肯透露是年尾，他笑言：「女友要我封口，如果我講得多，返去有排我受。因為女友好想低調，原本只係擺幾圍招呼親戚，但好多朋友都想嚟，依家應該擺20圍，愛回家嘅演員好似馬貫東同阮政峰都會做兄弟。（到時會唔會斟茶畀劇中嘅舅父歐瑞偉同家姐林淑敏？）應該都會，我唔係好知有咩規矩，我乜都唔識，都要問番舅父同家姐點搞。我仲未同公司攞假結婚，因為女朋友剛轉新工，要夾埋佢先攞假。」