鄧萃雯港劇「七年之癢」 祥仔恨再合作

藝人鄧萃雯、黎耀祥到土瓜灣出席活動，透露將會以錄音的方式合作宣揚好人好事。雯女透露一直有為大會擔任大使，今次難得邀請到老拍檔祥仔合作，二人即場身體力行，互相寫下對方優點，雯女寫下「咩都冇所謂」讚祥仔為人隨和，而祥仔則寫下「做事認真」大讚雯女專業。

有傳聞指雯女與金牌編劇陳寶華傾合作，回巢TVB拍攝新劇《多功能老婆》，惟最後TVB宣布女主角由楊千嬅出演，指她角色被搶。問到有關傳聞，雯女否認說：「冇呀，十畫都冇一撇，都係關你（祥仔）事啦！我返去同你做頒獎嘉賓，一行入去TVB就有後續啦！（話角色幫你度身訂造？）可能佢（陳寶華）心係咁諗，不過我自己點幫自己度身訂造呢？」

7年冇拍港劇

雯女又表示與陳寶華相熟，大家在北京經常見面，對方回香港拍港劇一定支持，不過傾合作就好像「搵日食飯」一樣掛在口邊，但仍然要等機會。祥仔着雯女具體地向監製們呼籲一下，她即笑說：「都係嗰句，有適合嘅劇本同角色就有機會，演員好被動，我成日都呼籲，好似《東華》咁呼籲，有廣東話劇本我都好想去演。」

雯女又指不少劇迷希望她與祥仔再合作，是美麗的期待，而自己拍過劇集《金枝慾孽貳》至今已有七年沒拍港劇，笑言有「七年之癢」，祥仔聞言建議合作古裝劇，笑言因雯女古裝較靚，不過雯女就恨拍時裝：「你唔明古裝化妝髮型要幾耐時間囉！加上時裝唔使背對白嘛！你係咪好悶呀？要我返嚟支持你！」祥仔聞言笑說：「係呀悶架，不如合作穿越啦！你着時裝穿越過嚟，穿越劇都好耐冇拍喇。《尋秦記》都重拍緊啦！」