「城嫂」方媛恨追仔！城城：交番畀我哋啦

天王郭富城（Aaron）今日現身馬場，義務化身打氣嘉賓見證近千人成功挑戰「最多人同時為雕像塗色」健力士世界紀錄誕生，城城甫步出場地就受在場人士熱烈歡迎，他表示一直都支持年輕人，還鼓勵年輕人要放下包袱，在不同的領域突破自己，只要做事專注、用心就可以激發潛能，更抵死笑言：「我有好多歌都好勵志，就好似《強》咁，不過依家啲年輕人可能未必好了解我啲歌，但如果想聽番Aaron哥哥嘅歌，可以上網聽番！」說畢城城就即場清唱數句《強》，獲得全場掌聲！最後，城城獲贈由嘉賓曼聯名宿白賴仁笠臣送出的足球，他開心得即席表演控球「回禮」。

同健力士紀錄有淵源

受訪時城城表示早前都有替單位拍攝短片，紀念曾經走過的歲月，他又指跟健力士世界大全好有緣分、淵源，曾幾度刷新紀錄：「喺音樂上有舞台紀錄、試過同萬人跳舞、仲有同好多人一齊Selfie，而今次就見證佢哋同時畫畫，只要同心協力就會成功，希望年輕人透過活動為將來奮鬥，創造美好人生。」

學唱兒歌冧囡囡

演唱會在即，問到會否經常於家中練唱？城城笑話成日都職業病上身，屋企人都習慣晒：「多數都會跑步唱歌，可以開聲、練氣，快歌同慢歌都會唱，跑住步唱慢歌難度都好高。（咁同囡囡會唱咩歌？）兒歌，點都要學吓，責任嚟嘅！」

談及家庭生活，城城打趣話希望大家關注於自己的工作上，更扯開話題指要關心年輕人身心發展，自己都會義不容辭參加公益善事。問到「城嫂」方媛（Moka）日前出活動表示想追仔，城城搞笑話：「交番畀我哋啦！」隨即就急腳趕車去浙江為明日（31日）舉行的青年音樂節綵排。