攬女爆房跳辣身舞 林雪跳到瞓醫院

藝人林雪於黃子華及佘詩曼主演的賀歲電影《棟篤特工》友情客串，他今次搏命演出，更拍到要瞓醫院。他拍攝前本來好風騷，不時爆粗，又搞笑地拎隻襪塞住大婆把口，點知埋位跳完辣身舞後即刻散晒，好彩並無大礙，好快又回復生猛風趣。

劇情講述林雪瞞住老婆去酒店爆房，同着性感內衣嘅外籍辣妹喺床上大跳辣身舞，不知幾咁開心，但踩住軟綿綿的床褥跳舞特別攰，所以香艷火辣的背後，林雪不止跳到差啲甩褲，仲跳到冇氣：「跳完乜都唔使做，床上啲嘢冇做好多年！」