谷住奶拍劇！陳敏之胸壓唐文龍驚滲奶

藝人陳敏之出席電台節目訪問，她指近日熱播的台慶劇《溏心風暴3》是她產後首個接拍的劇集：「啱啱知道有咗嗰陣接到劇本，即使生完之後就要即刻拍都照應承，因為對『溏心』系列有個情意結，不過都有同監製嗰啲講聲唔好寫咁多場戲畀我。」問及坐月時有否控制食量以保持最Fit狀態示人？她笑言︰「餵母乳唔可以唔食，當時照顧囝囝都係一腳踢，好快就瘦番，加上開拍之後都好忙，愈拍愈瘦，到最後身形連唔到戲，甚至有幾場戲要Retake添！」

於戲中飾演黃以愛的敏之與唐文龍有連場激情戲，敏之爆笑指：「唐文龍胸肌太勁、太大啦，一壓落嚟個心口抖唔到氣，好逼！當時我又谷奶，每隔4個鐘要泵一次奶，拍嗰陣幾驚會滲奶！但我哋都冇尷尬嘅，拍之前已經溝通好。」問到敏之有否跟先生備案，她說：「冇特別講，接到劇本嗰陣有輕輕講過一次囉，佢話出街嗰陣冇眼睇，我同佢講如果頂唔順就唔好睇啦﹗」