孖靚靚拍「三級」片 吳鎮宇怕整冧床

影星吳鎮宇、古天樂、袁詠儀（靚靚）及張達明到觀塘為新片進行開鏡儀式，戲中鎮宇及靚靚飾演夫妻，是相隔十多年後再合作，問到有否親熱戲？靚靚說：「大把！唔係點解接呀？」鎮宇即搞笑說：「張床要上好啲螺絲，唔好冧床呀！我哋部係三級片，係三級好笑，搞笑之中最好笑嗰個級別！」靚靚表示已幾年沒有拍電影，今次除了支持監製張達明之外，亦希望再跟鎮宇合作，鎮宇笑說：「個個女星同我合作完都食過翻尋味！」靚靚說：「係呀！我都lam lam脷！」

鎮宇表示電影劇本是多年前張達明的作品，曾經得獎，今次是他叫達明將劇本拍成電影：「因為依家大陸觀眾就等於我哋90年代，開始面對好多房屋生活問題 ，多咗好多城市病，咁當然香港都繼續係有土地問題，依家到大陸都有啦！佢哋會明白好多。（戲中你要叫佢做老竇？）係呀！叫佢做老竇，其實想佢出返嚟拍吓嘢囉！佢咁老個樣，不過佢仲覺得自己係小生。（想佢憑呢部戲得獎？）想佢攞劇本獎呀！」

問到有否為達明減收片酬？靚靚表示收正常價，鎮宇笑說：「佢監製啫！又唔係投資，搵得佢做監製即係有好多錢啦！我好忙㗎！抽時間出嚟幫佢怕，仲要減片酬？你睇吓話係達明復出或者最後一部戲，即刻碌到幾多人情卡，好多人客串。」