30歲生日遇的哥拒載 張名雅嬲豬報警

已為人母嘅前港姐張名雅（Carat）今日就喺社交網站上載咗一班好友同佢慶祝30歲生日嘅合照，佢仲話自己感動到喊添：「一入到來見到咁多好朋友真係好感動！（我哭得咁勁你地（哋）係咪真係會post出來）30歲啦，希望會更好！Thank you to all my dear friends for coming out on a weekday night! Had a blast! PS: thanks lo gong @kamhochoy for everything 」

不過喺呢個咁開心嘅日子，竟然有人搞到Carat嬲嬲豬。事關Carat遇到的士司機拒載，而且仲搞到要報警添！Carat表示自己唔係一個為小事而煩嘅人，為咗使命感所以先決定報警，佢希望得到一個公平答覆：「生日是開心的。但的士佢（拒）載唔係第一次遇到。不過由幾時開始香港嘅的士司機點解會咁樣嘅態度，亦繼續堅持自己係無錯？我從來都不為小事而煩。為了大眾市民。使命感確實跑來了。為什（甚）麼香港的士會拒載？實施係應該交給警方處理與否？我最終報警了，希望有個公平的答覆。」唔少網民都話自己曾經遇過拒載，所以都叫Carat唔好咁嬲生日應該閞心至啱。

東網聯絡上張名雅，她表示拒載事件是在尖沙咀發生的，她表示：「其實之前亦有試過（被拒載），但點解要報警？其實都唔想講咁多，今日又開心、又生日。因為拒載都算，有時你都明，上到架車又唔開，無辦法要落車。但係，不過我覺得如果個司機態度好少少嘅，我覺得都算啦。但係仲要好囂張咁，感覺真係好差。件事交咗畀警方，唔緊要啦，等警方處理。」