趙永洪演的士佬上癮 爆粗過癮改唔到口

藝人趙永洪在無綫熱播劇《降魔的》中飾演勁爛口的Chok爆的士司機「些粉」，令觀眾眼前一亮。他受訪時笑謂原本是文藝青年：「今次係咁爆粗係好過癮，演完後改唔到口，但我都係反映現實啫，好多師傅都係講呢啲對白。」

「邊個唔想上位」

提到他十年前憑處境劇《同事三分親》的「Marco」一角漸為人認識，趙永洪直認該劇是事業轉捩點，現尋求第二次重大突破：「我問每一個朋友我嘅演出點，佢哋都話我好稱職、做得好，好似嗰個人，但唔多覺眼，所以依家揀咗搞笑做自己戲路，因此慢慢多咗導演、監製搵我拍劇。」笑指自己是「九線藝員」的他坦言不滿足於現狀：「邊個唔想上位，邊個唔想做主角，但都係要等機會、搵機會！」

網民激讚演出

而尋晚趙永洪喺《降》嘅演出亦大獲網民讚賞，劇情講到佢嘅行家「龍貓」何遠東為咗養家頂更開工賺錢，而趙永洪就「黐」佢車去風流快活！之後佢突然話要去捉精靈，叫遠東停低車畀佢落車！正當趙永洪撳緊電話之際，身後傳來巨響，趙永洪心之不妙，原來畀墮樓嘅黃子恆上司壓中架車，喺車內嘅何遠東亦不幸身亡！

而趙永洪去到醫院後非常自責救唔到對方，「點解唔一下砸死我？」喺呢分半鐘獨白中，趙永洪由起初沉默嘅表現，慢慢推進到激動爆喊打自己，網民都激讚佢呢場戲好有層次，好催淚，仲話好過唔少人，希望佢日後可以多啲機會發揮，等佢攞獎呀！