|
亞視舊年熄機,緊接ViuTV開台,今年5月中另一免費電視台奇妙電視加入戰團,該台最近已經積極籌備開台。
奇妙電視將會推出一系列資訊旅遊節目,亦會播放自家製作電視劇《100天Best Before》,當中分有四個單元,由林耀聲主演嘅《熱戀100天》、鄭融主演嘅《閃婚100天》及未定卡士嘅《分手100天》同《婚前100天》。綜藝節目方面有盧海鵬、趙海珠等主持嘅《放試》、黎燕珊同曾美華主持嘅《朝拜傲媽》、林芊妤(Coffee)同吳日言主持嘅《吾男吾女》、邵仲衡主持嘅《香港事...香港是...》、歐錦棠及梁佩瑚主持嘅《無『恐』不入》等。
噚晚奇妙電視仲喺尖沙嘴舉行春茗,盧海鵬、黎燕珊、朱潔儀、Coffee、邵仲衡同陳倩揚等齊齊現身,佢哋仲同有線娛樂執行董事曾展章一齊「撈起」。有份主持新節目《放試》嘅鵬哥,仲極力推薦奇妙電視,佢話:「我逢嘢都試周圍試,我拍咗咁耐戲,有乜嘢未試過,支持吓新電視台,大家要幫手搞吓,希望搞旺佢,唔通希望佢『釘』咩。」
離開無綫嘅陳倩揚會主持親子飲食節目《細細Love》,倒戈嘅佢話:「當係新嘅學習環境,新人事新作風,我會盡全力,希望分享資訊畀啲媽咪。」陳倩揚話唔介意帶埋兩個囝囝一齊出鏡煮嘢食。同場嘅朱潔儀就表示將會主持飲食節目《餐桌商機》。
|
|