【嘉欣BB結婚】舊愛伍允龍：好戥嘉欣開心 林峯：恭喜佢呀

女神結婚了！新郎不是佢(哋)！鍾嘉欣情傾前無綫集團主席梁乃鵬嘅姪仔醫生Jeremy，今日宣佈去年底已經結咗婚，今個月27號就會補擺喜酒，仲疑似有孕遲啲會公佈。

鍾嘉欣同伍允龍拍拖8年，都未能開花結果，去年2月分手，有指係嘉欣BB為自己前途著想，加上伍允龍事業一直冇起色而怒斬情絲，今日伍允龍得知舊愛婚訊後大方送上祝福話:「我收到呢個消息我都好戥嘉欣開心，祝佢新婚快樂，God bless佢，God bless佢嘅Family。」
而早年被指力追嘉欣BB嘅林峯就回應道:「啱啱做嘢，都係啱啱聽到，嘩，恭喜佢呀，恭喜佢。」嘩，同噚日反應差咁遠嘅?噚日林峯同記者講:「你哋應該問番佢，呢啲報道我睇完就算。」