|
今日亞視執行董事葉家寶接受本報專訪,問作為七朝元老嘅佢,睇住亞視由盛轉衰,如果真係作最壞打算,想亞視營業到邊一日?葉家寶話:「希望係亞視台慶嗰一日,5月29號,希望能夠光榮結業,其實都籌備緊亞視台慶,以紀錄片形式進行,用大射燈,射住亞視各個員工同作品,登出佢哋個名,嚟到懷念過去種種,曾經有輝煌嘅亞視。」
問到覺唔覺得係王征搞死亞視?葉家寶話:「好多人有呢個講法,但係呢啲嘢要由歷史自己去評價,冰封三尺非一日之寒,亞視呢個問題係長期積弱,一入主股東已有爭拗,好多官司訴訟等種種原因。」
問到大股東王征為人?葉家寶話:「係一個性情好直嘅人,好難去改變佢嘅諗法,王征成日掛喺口邊係『舊思維係最可怕』,覺得我哋(亞視高層)意見好守舊,佢要用佢自己嘅方法,但係佢冇考慮接地氣,因為要睇返香港市場,觀眾口味,正如你睇TVB,做咗咁多年,O依家收益都開始下滑。」
葉家寶講到自己接咗102張傳票時笑言:「據聞係歷史上最高,自己都係打工仔,我都係受害者,當時雷競斌走咗冇人接呢個位,冇認真考慮法律嘅問題同責任,只係想為公司做啲嘢。」
問佢O依家堅守亞視,有冇聽過其他人鬧佢?佢話:「有聽人埋怨過,但我唔想逐個解釋,每人諗法唔同,好多人以為我高薪堅持呢個位,唔係,我唔係好高人工架啫,只想員工有好地方工作,相信亞視會有新希望同變化,要走容乜易,比封辭職信就一了百了。」
|
|