王宗堯：有老闆想投資開拍電影版《導火新聞線》

etin

今日港視劇《導火新聞線》大結局，編審潘漫紅就率領一眾演員梁小冰、周家怡、王宗堯、黃美棋等去銅鑼灣一間酒店一齊睇大結局，上個星期港視嘅收視上升，王宗堯就好開心咁話：「聽講去番開台收視，有人問冇得睇點算？我建議重新點播或睇嚟緊新劇《大眾情聖》，我地啲劇唔可以邊睇邊洗碗，要坐定定欣賞。」佢仲透露有老闆想投資開拍電影版，問到宗堯有冇求證，佢笑笑口抽亞視水話﹕「求證都冇用，出咗新聞都可以係假。」

因為《導火》而人氣急升嘅周家怡，最近就有報道傳佢同好姊妹爭仔，佢就否認話：「我哋都冇一齊去過新加坡，但如果識到金融才俊，我地都唔介意爭。」問到係唔係同林國斌分手，佢就避談話：「我係single and available，Square(方凝)BB要重新出發。」

而接棒嘅新劇《大眾情聖》噚日就有花絮片播出，當中有唔少kiss同床戲，蔣祖曼主動要求陳柏宇摸胸，陸駿光同林熹瞳有疑似全裸鏡頭，仲有好多敏感「性」問題，睇嚟又會成另一話題之作。