|
艺人黄建东去年凭TVB台庆剧《下流上车族》“保安陈”一角备受赏识,又获得“全能司仪大赛”冠军,不过事业得意,佢健康就响警号!黄建东日前(7日)晒出一大堆药袋相,加上佢戴晒口罩现身医院嘅相,又留言:“啱啱睇完耳鼻喉专科,因为左耳听唔到嘢,原来鼻窦炎导致中耳炎导致耳积水,盛惠$4,000吓咗一大跳,相士话我漏财真系有原因。”佢就提到有日喺内地拍摄时惹到感冒:“话说上个月喺深圳拍紧《黑色月光》嘅时候惹到感冒,试过有一晚喺酒店房全晚发烧发冷完全瞓唔到,第二日仲要全日戏都有份,惟有连放lunch都唔食偷时间补眠顶住。返咗香港睇医生食药有好转,但鼻涕同咳都仲有。”
跟住仲演变到佢左耳突然听唔到嘢,好似潜咗落水底咁,个耳膜仲胀痛,连拍戏对手:“深圳一杀青第二朝返香港即刻去睇耳鼻喉专科,原来感冒菌入咗鼻同耳变咗鼻窦炎同中耳炎然后变咗耳积水,医生要拮穿左耳个耳膜抽返少少积水出嚟,但系个左耳感觉仍然喺水底,同埋仲有好多积水渗紧出嚟。我睇过啲报道话中耳炎如果唔及早医的话,听觉有机会会永久受损变成弱听。冇咗听觉先发现原来听唔到嘢系咁辛苦,同世界所有人同事都好似有段距离咁。啲人一讲嘢细声啲我就已经听唔到,同埋唔知道自己讲嘢够唔够大声。好想快啲好番。好想只左耳快啲听番嘢。”
|
|