陈山聪“秘捞”带团游电视城 网民争住报名参加

etin

视帝陈山聪向来专业，不但夺奖翌日即继续为新剧开工，近日更“兼职”做埋导游，拍片带内地网民游TVB电视城：“好多人都好奇我哋开工嘅地方，今日就等我做导游，带大家重温一下港剧嘅经典场景啦！”一开始佢先介绍众艺人嘅一大排储物柜，之后就带大家去到剧集经常出现嘅医院出入口：“我哋好多时都会借用呢个走廊景、天幕位，如果大家有睇《白色强人》嘅时候，都会见到系呢度会有出现嘅场景。”随后佢步入电梯大堂，原来亦系多套时装剧出现过嘅著名景点：“《爱．回家》成日都会用嘅就系𨋢喇！呢度系我哋最多时装剧嘅一个景点。”并搭升降机去到7楼，笑指系秘密重地：“开会啊、见监制啊，都要去7楼㗎！”

之后，陈山聪去到TVB嘅员工餐厅，指不论咩部门嘅食饭戏都喺呢度拍摄，然后又去到停车场，指其剧集《十八年后的终极告白》及未播映嘅《隐形战队》都喺度拍摄重头戏，最后仲上到天台，不但系《十八年后的终极告白2.0》赵希洛跳楼一幕嘅取景地点，原来仲可以一口气望到整个古装街嘅景色，绝对系鲜为人知嘅最佳观景位。唔少内地网民对影片反应超热烈，笑指想参加TVB导赏团，建议由陈山聪亲自带队：“每个场景都很熟悉”、“叫TVB搞个入场费500HKD的电视城旅游啦”。