艺人袁伟豪与蔡思贝昨午(26日)出席主演无綫剧《法证先锋V》宣传时姗姗来迟,他们解释因为留守公司拍网上宣传素材,时间安排有偏差所致,并连声抱歉。 ​谈到日前开Live自爆非常紧张发线,袁伟豪说:“真嘅,近呢两、三年我不断有周期性脱发问题,可能因为天气同唔够瞓,呢个阶段真系担心嘅,因为唔知严重性去边,有睇皮肤科观察情况,反而如果有肚腩好小事,但始终我系靠个样搵食。(唔拍古装黐头套?)以前有拍过,但依家年纪唔同,生理状态不及年轻时。(同压力有关?)梗系有啦,无形压力非常之多,每日洗头都好多头发跌落嚟,一定过百条,维持咗成个月。上一年我有段时间将头发铲到好短,有一刻好心灰,唔知发生咩事。”
再问到是否压力影响情绪,他说:“情绪同生活压力都会有,始终过去两、三年市道比较差啲,工作不及以前,负面评论又多,同埋拍《铁探》时激烈减磅,身体调节可能失调,我都想内分泌控制得好啲,所以少咗饮酒、多啲休息,心情好坏就好睇日常。(你之前话传媒‘错重’。” 他解释说:“嗰次做新歌宣传,内文我亦有亲口讲过,希望大家明我用咗咁多时间心机,去创造属于自己嘅歌曲,但原来Focus唔喺作品上,令我突然间有啲反应。我唔需要为自己嘅反应掩饰,亦唔系我控制范围内,但最终发酵地宣传唔系我心谂原意嗰样嘢,呢啲反应亦唔系一朝一夕形成,系长期累积。(觉唔觉得自己情绪化?)情绪化我谂每一个人都会有,只系用咩方法搵出口,的而且确有啲难度,系一个重要嘅课题。我唔能够话完全唔关自己事,但一只手掌拍唔响,趁大家有机会见面,都想同保持良好嘅关系同沟通。”
对于记者指他可能“一竹竿打一船人”,他续说:“咁要睇大家嘅睇法,你哋叫我唔好对号入座嘅同事,系唔系你哋都唔应该对号入座呢?大家互相一面镜,一个小小嘅误会,可能愈发愈大,我着重大家一沟通多啲。(《爱‧回家》摆你上台。)咪好啰,处境剧搵到题材,都欢迎嘅,好小事,都过咗去嘞,无伤大雅。”而蔡思贝于《法》剧宣传开Live,同样被重提“发电机”花名,她直言全不介意。当被问到经历过负面新闻,有否窍门教袁伟豪应对,她说:“佢系前辈,唔使我教啦,同埋佢有做开运动,有用嘅。”
|