陈凯琳肚凸凸想生仔：我哋都锺意大家庭

etin

艺人陈凯琳（Grace）以形象大使身份出席沙田马场活动，她表示一身高贵打扮事前有给老公郑嘉颖过目：“我问佢会唔会觉得我个帽饰太夸张，佢话唔会，因为我系形象大使，今次搵咗朋友帮我度身订造咗顶帽，不过未畀小朋友睇，怕佢哋会拆烂顶帽。”她自嘲平时都是以T恤牛仔裤造型，难得好好打扮一番。

​提到由她监制兼主持的明珠台清谈节目反应好，Grace开心透露公司有意添食：“我哋第一季有12集，公司问我可唔可以做多26集，但我都有啲担心，咁多集要谂新主题，畀人新鲜感，同埋要谂请咩嘉宾，上次已出动咗细佬。（老公呢？）佢未出动，佢系压轴，佢有提议我今次可以以品味做主题，仲可以访问素人嘉宾。（你同老公拣另一半嘅品味边个好？ ）都系差唔多，大家成日话人拣人，我哋相识都系一个好时机。”他又大赞老公是一个到位的好爸爸，自己外出工作时，老公会负责照顾一对儿子，好让她放心工作：“所以如果拍26集节目，我都要细心考虑吓，但嘉颖好支持我，佢仲即时帮我谂题目。”

现场所见Grace有点肚凸凸，问她是否肥咗？她承认：“少少，可能系幸福肥。（系咪有喜讯公布？）唔系，可能只系肥咗。（会唔会追多个？）都可以，顺其自然，我哋两个都锺意小朋友。（想追个女？）唔系，我觉得仔都几好，好活泼，如果我问嘉颖，佢一定话仔女都无所谓，但我哋都锺意大家庭，多啲兄弟姊妹一齐成长会开心啲，而且长大后大家可以互相照顾大家。”